ਅਜੇ ਹਨੇਰਾ ਹੈ,
ਆਓ ਰਲ ਕੇ,
ਸਾਰੇ ਸਾਰੇ,
ਅਸੀ ਹੱਥ ਵਿਚ ਹੱਥ ਨੂੰ ਲੈ,
ਘੁੱਟੀਏ, ਘੁੱਟੀਏ।
ਆਓ ਸਾਰੇ ਮੀਤ ਤੇ ਦੁਸ਼ਮਣ,
ਨਿੱਕੇ ਵੱਡੇ,
ਆਪਣੇ ਅਤੇ ਬਿਗਾਨੇ,
ਅਜੇ ਹਨੇਰਾ ਹੈ,
ਆਓ ਰਲ ਕੇ,
ਸਾਰੇ ਸਾਰੇ,
ਅਸੀ ਹੱਥ ਵਿਚ ਹੱਥ ਨੂੰ ਲੈ,
ਘੁੱਟੀਏ, ਘੁੱਟੀਏ।
ਭਲਕੇ ਦਿਨ ਚੜ੍ਹਿਆਂ,
ਫਿਰ ਵੰਡੀਆਂ ਪਾਸਣ
ਚਾਨਣ ਤੇ ਪਰਛਾਵੇਂ।
ਤਦ ਕਈ ਪਿਆਰੇ,
ਜਿਨ੍ਹਾਂ ਨਾਲ
ਨਾ ਰਲਦਾ ਕੋਈ
ਮਿਲਸਣ ਆ ਕੇ।
ਪਿਆਰ ਉਨ੍ਹਾਂ ਦਾ
ਮਾਤ ਕਰੇਗਾ ਬਾਕੀ।
ਓਨ੍ਹਾਂ ਅੱਗੇ
ਬਾਕੀ ਸਾਰੇ
ਹੌਲੇ ਹੌਲੇ, ਫਿੱਕੇ ਫਿੱਕੇ!
ਅੱਖਾਂ ਦੀ ਸਿੰਞਾਣ ਬੁਰੀ!
ਭਲਕੇ ਦਿਨ ਚੜ੍ਹਿਆਂ,
ਕੋਈ ਵੈਰੀ ਲੱਗਣ ਮੱਥੇ;
ਦੇਖ ਉਨ੍ਹਾਂ ਨੂੰ
ਚਿਣਗ ਪਏਗੀ ਕੋਈ,
ਦਾਗ਼ ਪੈਣਗੇ,
ਮੰਦੀ ਦਿੱਸੂ,
ਰੰਗ ਰੰਗੀਲੀ,
ਸੋਹਣੀ ਸੋਹਣੀ,
ਪਿਆਰਾਂ ਵਾਲੀ ਚਾਦਰ।
ਅਜੇ ਹਨੇਰਾ ਹੈ,
ਆਓ ਰਲ ਕੇ,
ਸਾਰੇ ਸਾਰੇ,
ਅਸੀ ਹੱਥ ਵਿਚ ਹੱਥ ਨੂੰ ਲੈ,
ਘੁੱਟੀਏ, ਘੁੱਟੀਏ।
