ਅੱਖ ਰੋਵੇ ਸਾਰਾ ਜੱਗ ਦੇਖੇ, ਰੋਵੇ ਦਿਲ ਦਿਖਲਾਵਾਂ ਕੀਹਨੂੰ ?
ਅੱਜ ਪਏ ਦੋਵੇਂ ਹੰਝੂ ਕੇਰਨ, ਸੋਚ ਰਿਹਾਂ, ਸਮਝਾਵਾਂ ਕੀਹਨੂੰ ?
ਕੱਲ੍ਹ ਤੱਕ ਸੀ ਪੱਥਰਾਂ ਦਾ ਜਿਗਰਾ, ਅੱਜ ਮਿੱਟੀ ਬਣ ਭੁਰਿਆ ਏ,
ਇੱਕ ਟੁੱਟ-ਭੱਜ ਨੇ ਭੰਨ੍ਹ ਦਿੱਤਾ ਏ, ਦਿਲ ਦਾ ਹਾਲ ਸੁਣਾਵਾਂ ਕੀਹਨੂੰ ?
ਮੈਂ ਕੱਲਾ, ਦੁਖ-ਦਰਦ ਨੇ ਬਹੁਤੇ, ਦਰਦਾਂ ਮੈਨੂੰ ਘੇਰ ਲਿਆ ਏ,
ਦਰਦਾਂ ਵਿੱਚ ਕਿਸ ਦਰਦ ਵੰਡਾਣਾ ? ਦਰਦੀ-ਯਾਰ ਬਣਾਵਾਂ ਕੀਹਨੂੰ ?
ਐਧਰ ਮੈਂ, ਉਧਰ ਕੋਈ ਹੋਰ, ਤੇ ਵਿੱਚ ਏ ਅੱਤ ਪੁਰਾਣਾ ਰੁੱਖ,
ਖ਼ੌਰੇ ਚੜ੍ਹਦਾ-ਸੂਰਜ ਵੰਡੇ, ਧੁੱਪਾਂ ਕੀਹਨੂੰ ? ਛਾਵਾਂ ਕੀਹਨੂੰ ?
ਪਿਆਰ ਦੇ ਪੱਕੇ ਸਾਂਝੇ ਰਿਸ਼ਤੇ, ਟੁੱਟ ਗਏ ਕੱਚ ਦੀ ਚੂੜੀ ਵਾਂਗੂੰ,
ਖ਼ੌਰੇ ਹੁਣ ਇਲਜ਼ਾਮ ਪਏ ਦੇਵਣ, ਪੁੱਤਰ ਕੀਹਨੂੰ ? ਮਾਵਾਂ ਕੀਹਨੂੰ ?
ਸਾਨੂੰ ਵੀ ਸੱਜਣ ਤੋਂ ਵਿਛੜੇ, 'ਅਖ਼ਤਰ' ਕਈ ਸ਼ਾਮਾਂ ਨੇ ਹੋਈਆਂ,
ਸੱਜਣਾਂ ਬਾਝ ਸੁਨੇਹੜਾ ਦੇਵੇਂ, ਫ਼ਜ਼ਰੇ ਕਾਲਿਆ ਕਾਵਾਂ ਕੀਹਨੂੰ ?
