ਅਕਲੋਂ ਅੰਨੇ ਹੱਥ, ਬੰਦੂਕਾਂ, ਚੱਕ, ਨਿਸ਼ਾਨੇ ਕਰ ਦਿੱਤੇ ।
ਆਪਾਂ ਆਪਣੇ ਆਪ ਹੀ ਆਪਣੇ ਲੋਕ ਬਿਗਾਨੇ ਕਰ ਦਿੱਤੇ ।
ਇਹ ਲੋਕ ਸ਼ਮਾਂ ਦੀ ਫਿਤਰਤ ਨੂੰ, ਜਾਣਦਿਆਂ ਵੀ ਕਿਉਂ ਆਖਣ,
ਇਸ ਨੇ ਕਾਹਤੋਂ ਪਲ ਵਿਚ ਸਾੜ, ਸੁਆਹ, ਪਰਵਾਨੇ ਕਰ ਦਿੱਤੇ ।
ਆਪਣੀ ਮਿੱਟੀ ਦੀ ਖੁਸ਼ਬੋਈ, ਲੈਣ ਲਈ ਵੀ ਤਰਸ ਦੇ ਹਨ,
ਇਸ਼ਕ ਦੀ ਰੰਗਤ ਨੇ ਪਰਦੇਸੀ, ਦੇਖ ਦਿਵਾਨੇ ਕਰ ਦਿੱਤੇ ।
ਤੇਰੇ ਜਾਣ ਦੇ ਮਗਰੋਂ ਵੀ ਤਾਂ, ਤੇਰੀ ਚਰਚਾ ਛਿੜਦੀ ਹੈ,
ਇੱਕ ਤੇਰੇ ਕਿਰਦਾਰ ਨੇ ਹੀ ਹੈਰਾਨ ਜ਼ਮਾਨੇ ਕਰ ਦਿੱਤੇ ।
ਅਕਲਾਂ ਵਾਲੇ ਲੋਕਾਂ ਮੈਨੂੰ, ਕਾਫ਼ਿਰ ਆਖ ਬੁਲਾਇਆ ਹੈ,
ਆਸ਼ਕ ਦੇ ਲਈ, ਇਸ਼ਕ ਚ ਦੇਖੋ ਤੈਅ ਪੈਮਾਨੇ ਕਰ ਦਿੱਤੇ ।
ਤੇਰੀ ਹਰ ਗੱਲ ਨੂੰ ਹੀ ਮੈਥੋਂ ਸਤਿ ਬਚਨ ਕਹਿ ਹੋਣਾ ਨਹੀਂ,
ਏਸੇ ਕਰਕੇ ਆਪੇ ਹੋਇਆਂ ਦੂਰ, ਬਹਾਨੇ ਕਰ ਦਿੱਤੇ ।
ਮੰਗਤਿਆਂ ਨੂੰ ਤੇਰੀ ਰਹਿਮਤ ਸਦਕਾ, ਰੋਟੀ ਮਿਲਦੀ ਹੈ,
ਮੰਗਤਿਆਂ ਦੇ ਵਰਗੇ ਲੋਕੀਂ, ਵੀ ਤੂੰ ਦਾਨੇ ਕਰ ਦਿੱਤੇ ।
ਮੈਨੂੰ ਸਾਕੀ ਅਕਸਰ ਪੁੱਛੇ, ਦੱਸ ਅਮਨ ਹੁਣ ਕਿੱਥੋਂ ਰਹਿੰਨੈ,
ਆਖਿਰ ਕਿਹੜੀ ਗੱਲੋ ਤੂੰ, ਵੀਰਾਨ ਮੈਖ਼ਾਨੇ ਕਰ ਦਿੱਤੇ ।
