ਆਪਣੇ ਹੀ ਮੂੰਹ ਨੂੰ ਖੋਲ੍ਹਣ ਤੇ ਪਬੰਦੀ ਹੈ ।
ਗੂੰਗਿਆਂ ਵਿੱਚ ਬਹਿ ਕੇ ਬੋਲਣ ਤੇ ਪਬੰਦੀ ਹੈ ।
ਆਪਣੇ ਖਾਬਾਂ ਨੂੰ ਹੱਥੀਂ ਸਾੜ ਲੈ ਬੇਸ਼ੱਕ,
ਰਾਖ ਠੰਡੀ ਨੂੰ ਫਰੋਲਣ ਤੇ ਪਬੰਦੀ ਹੈ ।
ਨਾਗ ਹਿੱਕ ਤੇ ਮੇਲਦੇ ਨੂੰ ਜਰ ਲਿਆ ਕਰ, ਤੂੰ,
ਜੁੱਤੀਆਂ ਥੱਲੇ ਮਧੋਲਣ ਤੇ ਪਬੰਦੀ ਹੈ ।
ਜੇ ਗ਼ਜ਼ਲ ਕਹਿਣੀ ਤਾਂ ਤੁਕਬੰਦੀ ਨੂੰ ਰੱਖ ਪਾਸੇ,
ਹੁਣ ਕੜ੍ਹੀ ਸ਼ਬਦਾਂ ਦੀ ਘੋਲਣ ਤੇ ਪਬੰਦੀ ਹੈ ।
ਕੁਝ ਕੁ ਪਰਦੇ ਰੱਖਣੇ ਵੀ ਜ਼ਰੂਰੀ ਨੇ,
ਹਰ ਕਿਸੇ ਦੇ ਭੇਤ ਫੋਲਣ ਤੇ ਪਬੰਦੀ ਹੈ ।
ਮੈਂ ਜਦੋਂ ਗੁਜ਼ਰੇ ਸਮੇਂ ਚੋਂ ਭਾਲਦਾ ਤੈਨੂੰ,
ਫਰਜ਼ ਆਖਣ,ਉਸ ਨੂੰ ਟੋਲ੍ਹਣ ਤੇ ਪਬੰਦੀ ਹੈ ।
