ਅਸਾਨੂੰ ਨਾ ਸਹੀ, ਐਪਰ ਕਿਸੇ ਨੂੰ ਤਾਂ ਸਹੀ ਦੱਸੇ ।
ਅਸਾਡੇ ਨਾਲ ਰਿਸ਼ਤਾ ਆਪਣਾ, ਖ਼ੁਦ ਜ਼ਿੰਦਗੀ ਦੱਸੇ ।
ਗਲੀ ਵਿੱਚ ਖੇਡਦੇ ਬੱਚੇ ਦਾ ਮਜ਼ਹਬ ਜਾਣਦਾ ਹਾਂ ਮੈਂ,
ਮੇਰੇ ਵਿਹੜੇ 'ਚ ਡਿੱਗੀ ਗੇਂਦ ਦਾ ਮਜ਼ਹਬ ਕੋਈ ਦੱਸੇ ।
ਹੈ ਹਰ ਰਿਸ਼ਤੇ 'ਚ ਕਿੰਨੇ ਰਿਸਤਿਆਂ ਦੀ ਖੋਟ ਪਾ ਦਿੱਤੀ,
ਪਤਾ ਇਸਦਾ, ਅਸਾਡੇ ਰਿਸ਼ਤਿਆਂ ਦੀ ਦੁਰਗਤੀ ਦੱਸੇ ।
ਬੜੇ ਮਿੱਠੇ, ਬੜੇ ਮਾਸੂਮ ਹਨ, ਮਿਹਣੇ ਮੁਹੱਬਤ ਦੇ,
ਮੈਂ ਮੰਗਾਂ, ਉਸਦੇ ਗ਼ਮ ਉਸ ਤੋਂ, ਉਹ ਮੈਨੂੰ ਲਾਲਚੀ ਦੱਸੇ ।
ਸਫ਼ਰ ਤੈਅ ਕਰਕੇ ਮੰਜ਼ਿਲ ਪਾਣ ਦਾ, ਉਹ ਲੁਤਫ਼ ਕੀ ਜਾਨਣ ?
ਜਿਨ੍ਹਾਂ ਨੂੰ ਰਸਤਿਆਂ ਦਾ ਥਹੁ-ਪਤਾ ਵੀ ਜੋਤਸ਼ੀ ਦੱਸੇ ।
ਉਹ ਚਾਹੁੰਦਾ ਮਾਂ ਹੀ ਬਣਨਾ ਸੀ, ਪਿਆ ਪਰ ਈਸ਼ਵਰ ਬਣਨਾ,
ਹਕੀਕਤ ਇਹ, ਕਿਸੇ ਨੂੰ ਉਹ, ਕਿਵੇਂ ਦੱਸੇ ਤੇ ਕੀ ਦੱਸੇ ?
ਤੁਸੀਂ ਕਿਸ ਭਾਅ 'ਤੇ ਆਪਣੀ ਅਣਖ ਦਾ ਸੌਦਾ ਮੁਕਾਇਆ ਹੈ,
ਤੁਹਾਡੇ ਚਿਹਰਿਆਂ ‘ਤੇ, ਰੀਂਗਦੀ ਸ਼ਰਮਿੰਦਗੀ ਦੱਸੇ ।
