ਆਸ ਮੱਥਾ ਅੱਜ ਕੀਕਰ ਚਮਕਿਆ,
ਕਿਸ ਤਰ੍ਹਾਂ ਦੀ ਖ਼ਬਰ ਆਈ ਦੋਸਤਾ ।
ਛਿੜ ਪਈ ਝਰਨਾਟ, ਧਰਤੀ ਹੱਸਦੀ,
ਸੱਧਰਾਂ ਨੇ ਪੈਲ ਪਾਈ ਦੋਸਤਾ ।
ਝੂੰਮਦੀ ਹੋਈ ਕਲਪਣਾ ਦੀ ਡਾਲ ਤੇ,
ਜਿੰਦ ਬਹਿ ਕੇ ਚਹਿਚਹਾਈ ਦੋਸਤਾ ।
ਬੰਜਰਾਂ ਦੀ ਹਿਕ ਧੜਕੀ ਕਿਸ ਤਰ੍ਹਾਂ,
ਰੁੱਤ ਮੁੜ ਕੇ ਮੁਸਕਰਾਈ ਦੋਸਤਾ ।
ਅੰਬਰਾਂ ਤੇ ਧੂੜੀਆਂ ਕਿਸ ਲਾਲੀਆਂ,
ਜ਼ੁਲਫ ਧਰਤੀ ਦੀ ਸਜਾਈ ਦੋਸਤਾ ।
"ਕੌਣ ਅਣਖਾਂ ਸਾਡੀਆਂ ਵੰਗਾਰਦਾ ?"
ਥਲਾਂ ਵਿਚੋਂ ਵਾਜ ਆਈ ਦੋਸਤਾ ।
ਪਰਬਤਾਂ ਦਾ ਅੱਜ ਸੀਨਾ ਕੰਬਿਆਂ,
ਸੱਟ ਹੈ ਫਰਿਆਦ ਲਾਈ ਦੋਸਤਾ ।
ਫਾਂਧਕਾਂ ਦੇ ਘਰੀਂ ਜਾ ਕੇ ਵੇਖਿਆ,
ਮੌਤ ਵਰਗੀ ਚੁਪ ਛਾਈ ਦੋਸਤਾ ।
ਮਹਿਕ ਭਰੀਆਂ ਜਿਨ ਬਹਾਰਾਂ ਫੂਕੀਆਂ
ਲਾਟ ਹੁਣ ਇਹ ਡਗਮਗਾਈ ਦੋਸਤਾ ।
ਜ਼ਿੰਦਗੀ ਨੇ ਅੱਜ ਅੱਖਾਂ ਪੁੱਟੀਆਂ,
ਨਿਸਚਿਆਂ ਨੂੰ ਜਾਗ ਆਈ ਦੋਸਤਾ ।
