ਆਹ ਜੋ ਬੱਦਲ਼ ਹੈ ਨਾ, ਮਲੰਗ
ਇਹ ਮਲੰਗ ਮੈਨੂੰ ਕਰਦਾ ਹੈ ਤੰਗ-ਤੰਗ।
ਮੈਂ ਕੰਮ ’ਤੇ ਜਾਵਾਂ ਜਦ,
ਉੱਡਦਾ ਹੈ ਮੇਰੇ ਸੰਗ-ਸੰਗ।
ਆਹ ਜੋ ਬੱਦਲ਼ ਹੈ ਨਾ ਮਲੰਗ,
ਇਹ ਮਲੰਗ ਮੈਨੂੰ ਕਰਦਾ ਹੈ ਤੰਗ-ਤੰਗ।
ਪਾਣੀ ਉਡਾ ਸਮੁੰਦਰਾਂ ਤੋਂ,
ਮੇਰੇ ਤੇ ਪਤਲਾ ਕਰ ਸੁੱਟਦਾ
ਕੰਜੂਸ, ਮੱਖੀ-ਚੂਸ
ਫਿਰ ਬੂੰਦਾਂ ਮੂੰਹ ਭਰ ਕੇ, ਵਿਗੜਿਆ
ਭਿਓਂ ਦੇਂਦਾ ਮੇਰਾ ਅੰਗ-ਅੰਗ
ਆਹ ਜੋ ਬੱਦਲ਼ ਹੈ ਨਾ ਮਲੰਗ,
ਇਹ ਮਲੰਗ ਮੈਨੂੰ ਕਰਦਾ ਹੈ ਤੰਗ-ਤੰਗ।
ਕਦੇ ਬਰਫ਼ ਦੇ ਟੁਕੜੇ ਕਰ ਦਿਖਾਵੇ
ਮੈਨੂੰ ਰੰਗ ਬਦਲ਼ ਭਰਮਾਵੇ
ਕਦੇ ਪੱਤਿਆਂ ’ਤੇ ਬਹਿ ਵੇਖੇ
ਨਾ ਕਰੇ ਹਰਾਮੀ ਸੰਗ-ਸੰਗ
ਆਹ ਜੋ ਬੱਦਲ਼ ਹੈ ਨਾ ਮਲੰਗ,
ਇਹ ਮਲੰਗ ਮੈਨੂੰ ਕਰਦਾ ਹੈ ਤੰਗ-ਤੰਗ।
ਮੈਂ ਚੜ੍ਹਾਂ ਜਦ ਵੱਲ ਚੁਬਾਰੇ
ਮੈਨੂੰ ਵੇਖ ਕੇ ਬੜ੍ਹਕਾਂ ਮਾਰੇ
ਇਹ ਜਿੰਦਰੇ ਲਾ ਦੇਂਦਾ
ਸਾਰੇ ਤਾਰਿਆਂ ਨਾਲੇ ਚੰਦ-ਚੰਦ
ਆਹ ਜੋ ਬੱਦਲ਼ ਹੈ ਨਾ ਮਲੰਗ,
ਇਹ ਮਲੰਗ ਮੈਨੂੰ ਕਰਦਾ ਹੈ ਤੰਗ-ਤੰਗ।
ਹੁਣ ਜਦ ਮੇਰਾ ਦਿਲ ਆਇਆ
ਕਹਿੰਦਾ ਮੈਂ ਤਿਹਾਇਆ
ਹੁਣ ਰੋ-ਰੋ ਮੁੱਕ ਚੱਲਿਆ
ਜਿਹੜਾ ਉੱਡਦਾ ਸੀ ਵਾਂਗ ਪਤੰਗ-ਪਤੰਗ
ਆਹ ਜੋ ਬੱਦਲ਼ ਹੈ ਨਾ ਮਲੰਗ,
ਇਹ ਮਲੰਗ ਮੈਨੂੰ ਕਰਦਾ ਹੈ ਤੰਗ-ਤੰਗ।
