ਬਾਹਾਂ ਅਰਸ਼ ਵਲ ਰਤਾ ਕੁ ਉਲਾਰ ਲੈਣ ਦੇ,
ਇਹਨਾਂ ਤਾਰਿਆਂ ਨੂੰ ਰਾਹਾਂ 'ਚ ਖਲ੍ਹਾਰ ਲੈਣ ਦੇ ।
ਤੇਰੇ ਰੱਬ ਦਾ ਹੁਕਮ ਇਕ ਪਲ ਨ ਮੰਨਾਂ,
ਮੇਰੀ ਆਤਮਾ ਤੇ ਮੇਰਾ ਇਖ਼ਤਿਆਰ ਰਹਿਣ ਦੇ।
ਚੰਨ ਤਾਰਿਆਂ ਨੂੰ ਧਰਤ ਤੇ ਉਤਾਰ ਕੇ ਰਹੂੰ,
ਝਾਤੀ ਅਰਸ਼ ਵਲ ਰਤਾ ਮੈਨੂੰ ਮਾਰ ਲੈਣ ਦੇ।
ਮੈਂ ਨ ਹੁਸਨ ਕੋਲੋਂ ਪਿਆਰ ਵਾਲੀ ਖ਼ੈਰ ਮੰਗਦਾ,
ਮੈਨੂੰ ਪਿਆਰ ਵਿਚ ਹੁਸਨ ਦੀ ਬਹਾਰ ਲੈਣ ਦੇ ।
ਏਸ ਆਲ੍ਹਣੇ ਦੇ ਭਾਗ ਨਹੀਂ ਮੌਤ ਅੱਗ ਦੀ,
ਜ਼ਰਾ ਕਾਫ਼ਰਾਂ ਨੂੰ ਬਿਜਲੀਆਂ ਵੰਗਾਰ ਲੈਣ ਦੇ।
ਮੇਰੀ ਅਣਖ ਤੇਰੇ ਤਰਸ ਦਾ ਹਸਾਨ ਕਿਉਂ ਲਏ,
ਸਾਰਾ ਕਹਿਰ ਮੈਨੂੰ ਜਾਨ ਤੇ ਸਹਾਰ ਲੈਣ ਦੇ ।
ਤੇਰੇ ਪਿਆਲਿਆਂ ਚੋਂ ਜ਼ਹਿਰ ਮੈਂ ਨਿਸ਼ੰਗ ਪੀ ਗਿਆ,
ਮੈਨੂੰ ਬੁੱਕਾਂ ਵਿਚ ਜ਼ਿੰਦਗੀ ਨਿਤਾਰ ਲੈਣ ਦੇ ।
ਮੇਰੇ ਸੂਰਜਾਂ ਦੀ ਝਾਲ ਭਲਾ ਕਿੰਨ੍ਹੇ ਝੱਲਣੀ,
ਇਹ ਹੈ ਰਾਤ ਇਹਨੂੰ ਕਾਲਖਾਂ ਖਿਲਾਰ ਲੈਣ ਦੇ ।
ਤੇਰਾ ਪਿਆਰ ਸ਼ਾਲਾ ਜੁਗ ਜੁਗ ਚੜ੍ਹੇ ਨੇਪਰੇ,
ਸਾਨੂੰ ਨਿੱਕਾ ਜਿਹਾ ਗ਼ਮ ਹੀ ਉਸਾਰ ਲੌਣ ਦੇ ।
ਉਹ ਕੀ ਜ਼ਿੰਦਗੀ ਜੋ ਤੜਪ ਤੋਂ ਹਮੇਸ਼ ਸੱਖਣੀ ?
ਮੇਰੀ ਜਾਨ ਵਿਚ ਜਾਨ ਬੇਕਰਾਰ ਰਹਿਣ ਦੇ ।
