ਬੰਦ ਫੋ਼ਨ ਚੋਂ
ਮੀਂਹ ਵਰ੍ਹਦਾ ਹੈ
ਤਾਜ਼ਾ ਹਵਾ ਚੱਲਦੀ ਹੈ
ਧਿਆਨ ਨਾਲ ਸੁਣੋ
ਬੰਦ ਫੋ਼ਨ ਚੋਂ
ਫ਼ੁੱਲ ਝੜਦੇ ਹਣ
ਚਿੜੀਆਂ ਦਾ ਗੀਤ ਵਗਦਾ ਹੈ
ਬੰਦ ਫੋ਼ਨ ਨੇ ਦੱਸਿਆ ਹੈ
ਕਿ ਦੁੱਧ ਦੋਧੀ ਨਹੀਂ
ਗਾਂ ਦਿੰਦੀ ਹੈ
ਦੋਧੀ ਵੇਚਦਾ ਹੈ
ਬੰਦ ਫੋ਼ਨ ਚੋਂ
ਟਾਹਣੀ ਹਿਲਦੀ ਹੈ
ਅਪਣੀ ਨਿੰਮ ਤੇ ਪਏ
ਬਿੱਜੜੇ ਦੇ ਨਵੇਂ ਆਲ੍ਹਣੇ ਦੀ
ਖਬਰ ਮਿਲਦੀ ਹੈ
ਬੰਦ ਫੋ਼ਨ
ਦਸ ਦਿੰਦਾ ਹੈ
ਹੱਸ ਦਿੰਦਾ ਹੈ
ਕਿ ਮੈਂ ਇੱਕਲਾ ਨਹੀਂ
ਭਰੇ ਘਰ ਵਿਚ
ਪਿਤਾ ਕੋਲ ਬੈਠਾ ਹਾਂ
ਬੰਦ ਫੋ਼ਨ ਜਾਦੂਗਰੀ ਹੈ
ਚੁਟਕੀਆਂ ਵਿਚ
ਦੁੱਖ ਹਰ ਦਿੰਦਾ
ਮਾਂ ਦੇ ਫੁਲਕੇ ਦਾ ਸਵਾਦ
ਬਚਪਨ ਵਾਲਾ ਕਰ ਦਿੰਦਾ
ਬੰਦ ਫੋ਼ਨ
ਕਿਤਾਬ ਨੂੰ ਰਾਹ ਦਿੰਦਾ
ਸ਼ਬਦ ਨੂੰ ਵਰਤਣ ਦਿੰਦਾ
ਚੁੱਪ ਨੂੰ ਵਰ੍ਹਾ ਦਿੰਦਾ
ਬੰਦ ਫ਼ੋਨ
ਕੁੱਝ ਵੱਡਾ ਹੋਣ ਦਾ
ਮੌਨ ਦਾ ਸੁਨੇਹਾ ਹੈ
ਬੰਦ ਫ਼ੋਨ
ਧਰਤੀ ਦਾ ਬੀਜ ਹੈ
