ਬੇ-ਰੰਗੀਆਂ ਤਸਵੀਰਾਂ ਹੱਥੀਂ ਆ ਗਏ ਆਂ
ਲੱਗਦਾ ਏ ਤਕਦੀਰਾਂ ਹੱਥੀਂ ਆ ਗਏ ਆਂ
ਫੇਰ ਕਿਸੇ ਨੇ ਭੰਨ ਦਿੱਤਾ ਏ ਤੀਰਾਂ ਨੂੰ
ਫੇਰ ਕਿਸੇ ਦੇ ਵੀਰਾਂ ਹੱਥੀਂ ਆ ਗਏ ਆਂ
ਪਿਛਲੀ ਵਾਰ ਵੀ ਡੰਗਿਆ ਸੀ ਤਕਰੀਰਾਂ ਨੇ
ਮੁੜਕੇ ਫਿਰ ਤਕਰੀਰਾਂ ਹੱਥੀਂ ਆ ਗਏ ਆਂ
ਹਾਲਾਂ ਤੇ ਇੱਕ ਸੁਫ਼ਨਾ ਵੀ ਨਈਂ ਤੱਕਿਆ ਸੀ
ਪਹਿਲਾਂ ਹੀ ਤਾਬੀਰਾਂ ਹੱਥੀਂ ਆ ਗਏ ਆਂ
ਅੱਖਰਾਂ ਦੀ ਅੱਗ ਝੁੱਗੇ ਸਾੜਨ ਲੱਗ ਪਈ ਏ
ਕਿੰਜ ਦੀਆਂ ਤਹਰੀਰਾਂ ਹੱਥੀਂ ਆ ਗਏ ਆਂ
ਵੱਢੀ ਗਏ ਆਂ ਮੁੜ ਮੁੜ ਪਿੱਪਲ ਬੋਹੜਾਂ ਨੂੰ
ਤਾਂ ਤੇ ਜੰਡ ਕਰੀਰਾਂ ਹੱਥੀਂ ਆ ਗਏ ਆਂ
ਨੱਸਦੇ ਨੱਸਦੇ ‘ਸੰਧੂ’ ਜੀ ਤੰਗ ਜ਼ਿਹਨਾਂ ਤੋਂ
ਕਾਲ਼ੇ ਕੱਟ ਜ਼ਮੀਰਾਂ ਹੱਥੀਂ ਆ ਗਏ ਆਂ
