ਚੱਦਰ ਏ ਭਾਵੇਂ ਪੱਗ ਏ, ਤਾਰ ਤਾਰ ਦੇਖਨਾਂ ।
ਏਹੋ ਜਿਹਾ ਤਮਾਸ਼ਾ, ਵਾਰ-ਵਾਰ ਦੇਖਨਾਂ ।
ਫੁੱਲਾਂ ਦੀ ਆਸ ਲੈ ਕੇ ਮੈਂ ਗੁਲਸ਼ਨ 'ਚ ਆ ਗਿਆ,
ਗੁਲਸ਼ਨ ਦਾ ਪੋਟਾ-ਪੋਟਾ, ਖ਼ਾਰ ਖ਼ਾਰ ਦੇਖਨਾਂ ।
ਖ਼ੌਰੇ ਟਿਕਾਣੇ ਖੁੱਸੇ ਨੇ, ਨਹੀਂ ਹੋਰ ਲੱਭਦੇ,
ਕੁਰਲਾਂਦੀਆਂ ਕੂੰਜਾਂ ਦੀ ਡਾਰ ਡਾਰ ਦੇਖਨਾਂ ।
ਲੱਗਦਾ ਏ ਚੌਹਾਂ 'ਚੋਂ ਇਹਦਾ ਅਨਸਰ ਵਧੀਕ ਏ,
ਅੱਗ ਦੇ ਮਿਜ਼ਾਜ ਦੀ, ਮੈਂ ਨਾਰ ਨਾਰ ਦੇਖਨਾਂ ।
ਦੁਸ਼ਮਣ ਦੇ ਨਾਲ ਦੇਖਨਾਂ, ਦੁਸ਼ਮਣ ਦਾ ਅੱਜ ਸਲੂਕ,
ਯਾਰਾਂ ਦੇ ਨਾਲ ਖਹਿੰਦੇ, ਯਾਰ ਯਾਰ ਦੇਖਨਾਂ ।
ਖ਼ੌਰੇ ਤਾਬੀਰ ਹੋਵੇਗੀ 'ਅਖ਼ਤਰ' ਕੀ ਏਸ ਦੀ ?
ਚੜ੍ਹਿਆ ਹੋਇਆ 'ਮਨਸੂਰ' ਦਾਰ ਦਾਰ ਦੇਖਨਾਂ ।
