ਵਾਹ! ਬਣਾਈ ਕੀ ਏ ਚਾਹ!!
ਮਾਰ ਸੜ੍ਹਾਕੇ ਪੀ ਏ ਚਾਹ!!
ਅਰਬਾਂ-ਖਰਬਾਂ ਲੋਕ ਪਿਆਕੜ,
ਕਹਿੰਦੇ ਯਾਰ ਖਰੀ ਏ ਚਾਹ।
ਘਰ ਆਏ ਮਹਿਮਾਨਾ ਲਈ ਤਾਂ,
ਅਰਸ਼ੀ ਸੋਨ-ਪਰੀ ਏ ਚਾਹ।
ਮੂੰਹ ਫੂਕਦੀ-ਢਿੱਡ ਫੂਕਦੀ,
ਫਿਰ ਵੀ ਸਾਡੀ ਧੀ ਏ ਚਾਹ।
ਸੱਤ ਸਮੁੰਦਰ ਪਾਰੋਂ ਆਈ,
ਸਭ ਦੇ ਘਰਦੀ ਜੀ ਏ ਚਾਹ।
ਸਭ ਤੋਂ ਪਹਿਲਾਂ ਸੁਬਹ-ਸਵੇਰੇ,
ਪੀਣ ਨੂੰ ਕਰਦਾ ਜੀ ਏ ਚਾਹ।
ਚਾਹ ਦੇ ਗਿਣਵੇਂ ਇੱਕ-ਦੋ ਫਾਇਦੇ,
ਨੁਕਸਾਂ ਨਾਲ ਭਰੀ ਏ ਚਾਹ।
ਚਾਹ ਤਾਂ ਯਾਰੋ ਚਾਹ ਹੁੰਦੀ ਹੈ,
ਕਾਲੀ ਜਾਂ ਹਰੀ ਏ ਚਾਹ।
ਵਿਆਹ ਸ਼ਾਦੀ ਤੇ ਪਾਰਟੀਆਂ ਵਿੱਚ,
ਮਿਲਦੀ ਲਪਟ ਭਰੀ ਏ ਚਾਹ।
ਸ਼ਹਿਰ ਗਰਾਂ ਕਿਧਰੇ ਵੀ ਜਾਵੋ,
ਥਾਂ-ਪੁਰ ਥਾਂ ਧਰੀ ਏ ਚਾਹ।
ਚਾਹ ਦੇ ਬਾਝੋਂ ਕੀ ਜੀਵਨ ਹੈ!
ਕੜਕ ਬਣਾਕੇ ਪੀਏ ਚਾਹ।
