ਚੱਲੇਗੀ ਇਹ ਧੱਕਾ-ਸ਼ਾਹੀ ਕਿੰਨੀ ਦੇਰ ।
ਰਹਿਣਗੇ ਕੱਠੇ ਚੋਰ-ਸਿਪਾਹੀ ਕਿੰਨੀ ਦੇਰ ।
ਫੁੱਟੇਗਾ ਕੱਲ੍ਹ ਰੰਗ ਸਵੇਰਾ ਦੇਖ ਲਵੀਂ,
ਵਧਦੀ ਰਹੇਗੀ ਰਾਤ ਸਿਆਹੀ ਕਿੰਨੀ ਦੇਰ ।
ਇੱਕ ਦਿਨ ਪੈਰੀਂ ਮੰਜ਼ਿਲ ਨੇ ਆ ਲੱਗਣਾ ਏ,
ਉਖੜੇ ਰਹਿਣਗੇ ਰਸਤਿਉਂ ਰਾਹੀ ਕਿੰਨੀ ਦੇਰ ।
ਅੱਖਾਂ ਅੱਗੇ ਮੌਤ ਵੀ ਨੱਚਣ ਲੱਗ ਪਈ ਏ,
ਜੀਵਾਂਗਾ ਮੈਂ ਕੱਲਿਆਂ ਮਾਹੀ ਕਿੰਨੀ ਦੇਰ ।
ਜ਼ਾਲਮਾਂ ਔਖਾ ਸਾਹ ਲੈਣਾ ਕਰ ਦਿੱਤਾ ਸੀ,
ਚੁੱਪ ਰਹਿੰਦੇ ਮਜ਼ਲੂਮ ਇਲਾਹੀ ਕਿੰਨੀ ਦੇਰ ।
ਹੋਵੇਗੀ ਇਨਕਾਰੀ ਪਿਆਰ ਦੇ ਸੂਰਜ ਤੋਂ,
'ਆਹੂ' ਜਗ ਦੀ ਕੋਰ ਨਿਗਾਰੀ ਕਿੰਨੀ ਦੇਰ ।
