ਚੰਡੀਗੜ੍ਹ ਤੋਂ ਡਿਗਰੀ ਸਾਨੂੰ ਆਈ ਹੈ ।
ਨੌਕਰੀਆਂ ਦੇ ਦਫ਼ਤਰ ਨੂੰ ਪਰਤਾਈ ਹੈ ।
ਕਾਊਂਟਰ ਉੱਤੇ ਬੈਠੀ ਹੋਈ ਸੋਨ-ਚਿੜੀ ,
ਬੀਅਰ-ਬਾਰ 'ਚ ਰਹਿ ਕੇ ਵੀ ਤਿਰਹਾਈ ਹੈ ।
ਜਿਹੜੀ ਥਾਂ ਤੋਂ ਮੁੱਦਤ ਪਹਿਲੋਂ ਤੁਰਿਆ ਸਾਂ,
ਉਸ ਥਾਂ 'ਤੇ ਹੀ ਕਿਸਮਤ ਫੇਰ ਲਿਆਈ ਹੈ ।
ਸੂਰਜ ਨੇ ਸਰਕਾ ਕੇ ਪੱਲਾ ਸਰਘੀ ਦਾ ,
ਧਰਤੀ ਤੋਂ ਨੇੜੇ ਦੀ ਹੱਦ ਮੁਕਾਈ ਹੈ ।
ਲਾਲ ਹਨੇਰੀ ਆ ਕੇ ਪਾੜ ਮੁਕਾਏਗੀ,
ਟੋਏ ਤੋਂ ਟਿੱਬੇ ਦੀ ਬਹੁਤ ਉਚਾਈ ਹੈ ।
ਪੈਲੀ-ਪੈਲੀ ਤਿੱਤਰ ਲੱਭਦੇ ਫਿਰਦੇ ਹਾਂ ,
ਇਹ ਕੇਹੀ ਜਗਤਾਰ* ਨੇ ਆਦਤ ਪਾਈ ਹੈ !
ਮੇਰੇ ਵਰਗਾ ਹੈ ਚੌਰਸਤੇ ਦਾ ਕੈਕਟਸ,
ਜਿਸ ਤੋਂ ਹਰ ਰਾਹੀ ਨੇ ਅੱਖ ਚੁਰਾਈ ਹੈ।
