ਛੱਲੇ ਅਤੇ ਜ਼ੰਜੀਰਾਂ ਸਾਂਭ ਕੇ ਰੱਖਾਂਗਾ ।
ਖ਼ਤਾਂ ਸਣੇ ਤਸਵੀਰਾਂ ਸਾਂਭ ਕੇ ਰੱਖਾਂਗਾ ।
ਸ਼ੁੱਕਾ ਫੁੱਲ ਤੇ ਜ਼ਾਤੀ ਡਾਇਰੀ, ਲਾਲ ਰੁਮਾਲ,
ਆਪਣੀਆਂ ਕੁੱਲ ਜਾਗੀਰਾਂ ਸਾਂਭ ਕੇ ਰੱਖਾਂਗਾ ।
ਜਦ ਤੀਕਰ ਨਾ ਮੇਰੇ ਲੇਖ ਲਿਖੇਂਗਾ ਤੂੰ,
ਤੇਰੀ ਸੌਂਹ ਤਕਦੀਰਾਂ ਸਾਂਭ ਕੇ ਰੱਖਾਂਗਾ ।
ਭਾਵੇਂ ਅਜ ਅਹਿਮੀਅਤ ਨਈਉਂ ਉਨ੍ਹਾਂ ਦੀ,
ਫਿਰ ਵੀ ਸਭ ਤਹਿਰੀਰਾਂ ਸਾਂਭ ਕੇ ਰੱਖਾਂਗਾ ।
ਤੇਰੇ ਨਾ ਦੀ ਖ਼ਵਰੇ ਕਿਹੜੀ ਲੀਕ ਹੋਵੇ,
ਹੱਥਾਂ ਵਿੱਚ ਲਕੀਰਾਂ ਸਾਂਭ ਕੇ ਰੱਖਾਂਗਾ ।
'ਸ਼ਾਦ' ਮੈਂ ਆਪਣਾ ਮਾਜ਼ੀ ਚੇਤੇ ਰੱਖਣ ਲਈ,
ਪਟੀਆਂ ਹੋਈਆਂ ਲੀਰਾਂ ਸਾਂਭ ਕੇ ਰੱਖਾਂਗਾ ।
