ਚੋਖੀ ਰੌਣਕ ਦੇਖ ਕੇ ਅੱਖ ਦਾ ਹਾਲ ਗਵਾਚਾ ਹੋਇਆ ।
ਭੀੜ-ਭੜੱਕੇ ਦੇ ਵਿਚ ਜਿਸਰਾਂ ਬਾਲ ਗਵਾਚਾ ਹੋਇਆ ।
ਨਿਸਬਤ ਦੀ ਖ਼ੁਸ਼ਬੂਈ ਵਾਲੀ ਲੀਰ ਨਾ ਭੁੱਲੇ ਮੈਨੂੰ,
ਮੇਲਾ ਲੱਗੇ ਯਾਦ ਪਵੇ ਰੁਮਾਲ ਗਵਾਚਾ ਹੋਇਆ ।
ਕਦੀ ਨਾ ਡਿੱਠਾ ਸੁੱਕੇ ਪੱਤਰ ਸ਼ਾਖ਼ਾਂ ਨੂੰ ਮੁੜ ਲੱਗੇ,
ਕਦੀ ਨਾ ਸੁਣਿਆ ਮੁੜਕੇ ਆਇਆ ਸਾਲ ਗਵਾਚਾ ਹੋਇਆ
ਮੁੱਦਤਾਂ ਤੋੜੀ ਯਾਦ ਰਵੇ੍ਹਗਾ ਚੈਨ ਅਸਾਂ ਜੋ ਪਾਇਆ,
ਮੁੱਦਤਾਂ ਤੋੜੀ ਰਿਹਾ ਏ ਸਾਡੇ ਨਾਲ ਗਵਾਚਾ ਹੋਇਆ ।
ਦਿਲ ਦੇ ਚੋਰ ਨੂੰ ਢੂੰਡਣ ਚੜ੍ਹਿਐ 'ਅਨਵਰ' ਨੂੰ ਕੀ ਕਰੀਏ,
ਮੇਲੇ ਦੇ ਵਿਚ ਲੱਭਦਾ ਫਿਰਦੈ ਮਾਲ ਗਵਾਚਾ ਹੋਇਆ ।
