ਜਦੋਂ ਤਕ ਦਮ 'ਚ ਦਮ ਬਾਕੀ ਰਹੇਗਾ,
ਮਿਰੇ ਨੈਣਾਂ 'ਚ ਨਮ ਬਾਕੀ ਰਹੇਗਾ ।
ਹੁਣੇ ਮਰ ਜਾਂ ਰਤਾ ਵਿਸ਼ਵਾਸ ਹੋਵੇ,
ਮਿਰੇ ਪਿੱਛੋਂ ਨ ਗ਼ਮ ਬਾਕੀ ਰਹੇਗਾ ।
ਤਿਰੇ ਹੰਝੂ ਹੁਣੇ ਆ ਪੂੰਝ ਦੇਵਾਂ,
ਨਹੀਂ ਤਾਂ ਇਕ ਜਨਮ ਬਾਕੀ ਰਹੇਗਾ ।
ਮੈਂ ਖ਼ੁਸ਼ਬੋ ਹਾਂ ਨ ਮੈਨੂੰ ਤੇਗ਼ ਪੋਹੇ,
ਸਦਾ ਜ਼ੁਲਫਾਂ 'ਚ ਖ਼ਮ ਬਾਕੀ ਰਹੇਗਾ ।
ਮਿਲੇਗੀ ਲਾਸ਼ ਮੰਜ਼ਿਲ ਕੋਲ ਮੇਰੀ,
ਕੋਈ ਇਕ ਅਧ ਕਦਮ ਬਾਕੀ ਰਹੇਗਾ ।
ਤੂੰ ਲਾਸਾਂ ਪਾ ਕੇ ਮੇਰੀ ਰੂਹ ਜਗਾਈ,
ਹਮੇਸ਼ਾਂ ਇਹ ਕਰਮ ਬਾਕੀ ਰਹੇਗਾ ।
ਜੇ ਮੈਨੂੰ ਅਰਸ਼ ਤਕ ਕੇ ਮੁਸਕਰਾ ਦੇ,
ਮੈਨੂੰ ਤਾਂ ਵੀ ਭਰਮ ਬਾਕੀ ਰਹੇਗਾ ।
