ਮੇਰੇ ਦਰਦਾਂ ਭਰਿਆ ਟੋਕਰਾ, ਭਾਰਾ ਹੋਇਆ ਪੈਣਾ ਖੋਲ੍ਹਣਾ ।
ਇੱਕ ਇੱਕ ਕਰਕੇ ਸੁੱਟੀਦਾ ਜਾਂ ਪਲਟ ਕੇ ਸਾਰਾ ਡੋਲ੍ਹਣਾ ।
ਢਕੀਆਂ ਹੱਡ ਬੀਤੀਆਂ, ਖੁੱਲ੍ਹੀਆਂ ਜੱਗ ਬੀਤੀਆਂ,
ਸੱਧਰਾਂ ਮਾਰ ਸਜਾਈਆਂ, ਸੁੱਚੀਆਂ, ਪੈਰੀਂ ਨਾ ਰੋਲਣਾ ।
ਕੁਝ ਬਾਬਲ ਦੇ ਨਾਵੇਂ, ਕੁਝ ਸੋਹਣਿਆਂ ਦੀ ਛਾਵੇਂ,
ਸੁਕਾ ਕੇ ਸਾਂਭੀਆਂ, ਨਾ ਦਾਗ਼ੀ, ਨਾ ਰੰਗ ਘੋਲਣਾ ।
ਦਰਿਆ ਵਾਗੂੰ ਸੁੱਚੀਆਂ, ਵਾਂਗ ਸਮੁੰਦਰਾਂ ਖਾਰੀਆਂ ।
ਮਰਜ਼ੀ ਖਿਲਾਫ਼ ਸਾੜੀਆਂ, ਸੰਸਕਾਰੀਆਂ ਕਿਹੜਾ ਬੋਲਣਾ ।
ਕੁਝ ਪਏ ਨੇ ਸਾਹਾਂ ਕੋਲ, ਜ਼ਮਾਨੇ ਦੇ ਮੰਦੜੇ ਬੋਲ ।
ਰੋਜ਼ ਵਜਾਈਏ ਢੋਲ, ਫੜ ਤੱਕੜੀ ਸੱਚ ਤੋਲਣਾ ।
ਨਾ ਰੱਖੀ ਕੋਈ ਆਸ, ਨਾ ਰੱਖਣ ਦੀ ਪਿਆਸ ।
ਨਾ 'ਸਰਬ' ਕਰੇ ਵਿਸ਼ਵਾਸ਼, ਰੱਬ ਵਰਗਾ ਵੀ ਨਹੀ ਢੋਲਣਾ ।
ਨਾ ਦਰਦਾਂ ਭਰਨਾ ਹੁਣ ਟੋਕਰਾ, ਨਾ ਪਊ ਕਦੇ ਵੀ ਡੋਲਣਾ ।
