ਜੋ ਦਿਲ 'ਚ ਹੋਵੇ ਦੱਸ ਦਿਆ ਕਰੋ ।
ਹਾਸਾ ਆਵੇ ਤੇ ਹੱਸ ਲਿਆ ਕਰੋ ।
ਕੋਈ ਨਹੀਂ ਵੇਂਹਦਾ ਕਿਸੇ ਵੱਲ ।
ਰੋਣਾ ਆਵੇ ਤੇ ਰੋ ਲਿਆ ਕਰੋ ।
ਕੌਣ ਕਿਸੇ ਨਾਲ ਜਨਮਿਆਂ ।
ਕੌਣ ਕਿਸੇ ਲਈ ਮਰਦਾ ਏ ।
ਵਿੱਚ ਗ਼ਰੀਬੀ ਸਿਵਾਏ ਮਾਂ ਦੇ ।
ਕੌਣ ਕਿਸੇ ਨਾਲ ਖੜ੍ਹਦਾ ਏ ।
ਨਿੱਕੀ ਜਿਹੀ ਜ਼ਿੰਦਗੀ ਹੈ ।
ਜੀਓ ਵਾਂਗ ਮੁਸਾਫਿਰ ਦੇ ।
ਨਾਨਕ ਨੂੰ ਵੀ ਲੋਕਾਂ ਆਖਿਆ ।
ਭੂਤਨਾ ਬੇਤਾਲਾ ਹੈ ਓਹ ।
ਸਰਬ ਵੱਲ ਵੇਖੋ, ਕਿੰਨੀ ਬੇਬਾਕ ਹੈ ।
ਝੱਟ ਦਿਲ ਦੀ ਕਹਿ ਜਾਂਦੀ ।
ਅੱਖਰਾਂ ਨੂੰ ਲਿਖਦੀ ਸੋਚ ਕੇ ।
ਕਿ ਦੁਨੀਆਂ ਡਰਦਿਆਂ ਨੂੰ ਡਰਾਉਂਦੀ ।
ਜਦ ਕਲਮ ਨੂੰ ਹੱਥ 'ਚ ਫੜ੍ਹ ਲਿਆ ।
ਫਿਰ ਸੰਗਣਾ ਕੀ ਸੰਗਾਉਣਾ ਕੀ ।
ਜਦ ਮੰਨਣੀ ਰਜ਼ਾ ਹੀ ਨਾਨਕ ਦੀ ।
ਸੱਚ ਲਿਖਣ ਲੱਗੇ ਸ਼ਰਮਾਉਣਾ ਕੀ ।
ਸਾਡੇ ਵੀਰਾਂ ਵਿੱਚ ਅੱਜ ਖੜਕ ਪਈ ।
ਮਰਨ ਮਰਾਉਣ ਤੇ ਆ ਗਏ ਨੇ ।
ਦਬਕਾ ਛੱਡੀਏ ਜ਼ੋਰ ਦੀ, ਬਣ ਵੱਡੇ ।
'ਸਰਬ' ਕੋਈ ਤਾਂ ਫ਼ਰਜ਼ ਨਿਭਾ ਦਿਆ ਕਰੋ ।
ਜੋ ਦਿਲ 'ਚ ਹੋਵੇ ਕਹਿ ਦਿਆ ਕਰੋ ।
ਹਾਸਾ ਆਵੇ ਤੇ ਹੱਸ ਲਿਆ ।
ਕੋਈ ਨਹੀਂ ਵੇਂਹਦਾ ਕਿਸੇ ਵੱਲ ।
ਰੋਣਾ ਆਵੇ ਤੇ ਰੋ ਲਿਆ ਕਰੋ ।
