ਦਿਲ ਦੇ ਵਿਹੜੇ ਘੁੰਗਰੂ ਵੱਜਣ,ਕੌਣ ਮੇਰੇ ਘਰ ਆਇਆ ।
ਕਿਸ ਨੇ ਬੂਹੇ ਦਸਤਕ ਦਿੱਤੀ,ਕਿਸ ਨੇ ਰਾਗ ਅਲਾਇਆ ।
ਸਖੀ ਸਹੇਲੀ ਰਲ਼ਮਿਲ਼ ਆਓ, ਗੀਤ ਖੁਸ਼ੀ ਦੇ ਗਾਈਏ
ਮੁੱਦਤਾਂ ਬਾਦ ਕਿਤੇ ਜਾ ਕੇ, ਹੈ ਮਾਹੀ, ਦਰ ਖੜਕਾਇਆ ।
ਵਿਹੜੇ ਬੇਰੀ ਰੌਸ਼ਨ ਹੋਈ, ਪੁੰਨਿਆ ਦਾ ਚੰਨ ਚੜ੍ਹਿਆ
ਚੰਨ ਮੁਖੜਾ,ਸੱਚੀਂ!ਦਿਲਬਰ ਦਾ,ਮੈਨੂੰ ਨਜ਼ਰੀਂ ਆਇਆ ।
ਉੱਠ ਨੀ ਮਾਏ, ਤੇਲ ਚੁਆਈਏ, ਵੰਡੀਏ ਹਲਵੇ ਖੀਰਾਂ
ਬੂਹੇ ਮਾਹੀ ਵੇਖ ਕੇ ਮੇਰਾ, ਫਿਰ ਜੋਬਨ ਮੁਸਕਾਇਆ ।
ਨਾਜ਼ ਹੈ ਮੈਨੂੰ, ਫੌਜੀ ਮੇਰਾ, ਰੱਬ ਦਾ ਦੂਜਾ ਨਾਂ ਹੈ
ਉਸਦੀ ਸੁੱਖ ਸਲਾਮਤ ਲਈ, ਮੈਂ ਸੂਫ਼ੀ ਬਾਣਾ ਪਾਇਆ ।
ਉਸਦੇ ਹੱਸਮੁੱਖ ਚਿਹਰੇ ਸਾਡੇ ਵਿਹੜੇ ਰੌਣਕ ਲਾਈ
ਜੀਆ ਜੰਤ ਸੱਭ ਨੱਚਣ ਟੱਪਣ,ਚੜ੍ਹਿਆ ਰੂਪ ਸਵਾਇਆ ।
ਸ਼ਾਲਾ ਦਿਲ ਦੇ ਵਿਹੜੇ, ਰੱਬਾ, ਹੱਸਦੇ ਵੱਸਦੇ ਰੱਖੀਂ
'ਉੱਪਲ' ਦਰਦ ਵਿਛੋੜੇ ਵਾਲ਼ਾ, ਨਹੀਂ ਜਾਂਦਾ ਹੰਢਾਇਆ ।
