ਦਿਲ ਹੈ ਇਕ ਦਰਿਆ ਕੋਈ ਕਤਰਾ ਨਹੀਂ ।
ਦਿਲ ਹੈ ਇਕ ਪੁਸਤਕ ਕੋਈ ਵਰਕਾ ਨਹੀਂ ।
ਸ਼ਹਿਰ ਦੀ ਹੱਦ ਤੀਕ ਹਨ ਇਹ ਹਮ-ਸਫ਼ਰ,
ਸ਼ਹਿਰ ਤੋਂ ਅੱਗੇ ਇਨ੍ਹਾਂ ਤੁਰਨਾ ਨਹੀਂ ।
ਖ਼ੂਬਸੂਰਤ ਹਨ ਮੁਖੌਟੇ ਹਰ ਜਗ੍ਹਾ ,
ਖ਼ੂਬਸੂਰਤ ਹੁਣ ਕਿਤੇ ਚਿਹਰਾ ਨਹੀਂ ।
ਹੁਣ ਗ਼ਜ਼ਲ ਅਪਣੀ ਦਾ ਹੈ ਚਰਚਾ ਹਜ਼ੂਰ !
ਗ਼ਮ ਨਹੀਂ ਜੇ ਆਪਣਾ ਚਰਚਾ ਨਹੀਂ।
ਜਿਸ ਦਾ ਪੁੱਛੋ ਹਾਲ ਇਹ ਹੀ ਆਖਦਾ ,
'ਠੀਕ ਤਾਂ ਲੇਕਿਨ ਹੈ ਸਭ ਅੱਛਾ ਨਹੀਂ' ।
ਰੋਜ਼ ਤਾਜ਼ੀ ਕਬਰ 'ਇਕਵਿੰਦਰ' ਬਣੇ,
ਫੇਰ ਵੀ ਸੂਰਜ ਕਦੇ ਮਰਦਾ ਨਹੀਂ ।
ਉਸ ਗਜ਼ਲ ਦੇ ਵਾਂਗ ਹੈ ਇਹ ਜ਼ਿੰਦਗੀ,
ਜਿਸ ਦਾ 'ਇਕਵਿੰਦਰ' ਕੋਈ ਮਕਤਾ ਨਹੀਂ ।
