ਨ ਮਿਲੀ ਦਿਲ ਨੁੰ ਦਿਲਬਰੀ ਨ ਮਿਲੀ,
ਖ਼ੁਸ਼ ਹਾਂ ਮੈਨੂੰ ਕਦੇ ਖ਼ੁਸ਼ੀ ਨ ਮਿਲੀ।
ਅਪਣੇ ਗ਼ਮ ਦਾ ਸਵਾਦ ਵੀ ਲੈਂਦਾ,
ਪਰ ਤਿਰੇ ਗ਼ਮ ਤੋਂ ਵਿਹਲ ਹੀ ਨ ਮਿਲੀ।
ਤੇਰੇ ਗ਼ਮ ਨੇ ਉਹ ਹੋਸ਼ ਬਖ਼ਸ਼ੀ ਹੈ,
ਦੋ ਘੜੀ ਸਾਨੂੰ ਬੇਖ਼ੁਦੀ ਨ ਮਿਲੀ।
ਉਮਰ ਦੀ ਇਕ ਘੜੀ ਹੀ ਬਸ ਤੋਬਾ,
ਚੰਗਾ ਏ ਉਮਰ ਇਕ ਸਦੀ ਨ ਮਿਲੀ।
ਚਰਚਾ ਸੁਣਿਆ ਸੀ ਜਿਸ ਜ਼ਮੀਂ ਦਾ ਬੜਾ,
ਏਥੇ ਪਹੁੰਚੇ ਤਾਂ ਉਹ ਜ਼ਮੀਂ ਨਾ ਮਿਲੀ।
ਪਿਆਰ ਤੈਥੋਂ ਮਿਲਨ ਦੀ ਆਸ ਨ ਸੀ,
ਤੇਰੇ ਦਰ ਤੋਂ ਤਾਂ ਬੇਰੁਖ਼ੀ ਨ ਮਿਲੀ ।
ਮੌਤ ਪਾਸੋਂ ਉਮੀਦ ਕੀ ਰਖੀਏ,
ਜ਼ਿੰਦਗਾਨੀ ਤੋਂ ਜ਼ਿੰਦਗੀ ਨ ਮਿਲੀ ।
