ਦਿਲਾਂ ਵਿੱਚ ਵੱਸ ਗਏ ਜਿਹੜੇ ਉਹੀ ਦਿਲਦਾਰ ਹੁੰਦੇ ਨੇ ।
ਜੋ ਲੁੱਟਣ ਆਪਣੇ ਬਣ ਕੇ ਫਰੇਬੀ ਯਾਰ ਹੁੰਦੇ ਨੇ ।
ਬੜੇ ਮਾਸੂਮ ਦਿਸਦੇ ਨੇ ਬੜੇ ਭੋਲੇ ਜਿਹੇ ਲੱਗਣ
ਦਗਾ ਇਹ ਕਰਨ ਦੇ ਵੇਲੇ ਬੜੇ ਹੁਸ਼ਿਆਰ ਹੁੰਦੇ ਨੇ ।
ਜਿਨਾਂ ਦੀ ਨੀਤ ਖੋਟੀ ਹੈ ਭਰੋਸਾ ਕੀ ਮਲਾਹਾਂ ਦਾ
ਹਮੇਸ਼ਾ ਡੋਬ ਦੇਂਦੇ ਪੂਰ ਪਰ ਖੁਦ ਪਾਰ ਹੁੰਦੇ ਨੇ ।
ਸਦਾ ਹੀ ਬੋਲਦੇ ਮਿੱਠਾ ਨਿਭਾਵਣ ਭੂਮਿਕਾ ਹਰ ਇਕ
ਹਯਾਤੀ ਵਿੱਚ ਡਰਾਮੇਬਾਜ਼ ਕੁਝ ਕਿਰਦਾਰ ਹੁੰਦੇ ਨੇ ।
ਉਹ ਮਰ ਕੇ ਵੀ ਅਮਰ ਹੁੰਦੇ ਡਟਣ ਜੋ ਜੁਲਮ ਦੇ ਅੱਗੇ
ਮਸੀਹੇ ਤਾਂ ਅਜੇਹੇ ਲੋਕ ਹੀ ਹਰ ਵਾਰ ਹੁੰਦੇ ਨੇ ।
