ਏਨ੍ਹਾਂ ਚੋਂ ਕੀ ਮੇਰਾ ਹੈ
ਜਾਨ ਤਿਰੀ, ਦਿਲ ਤੇਰਾ ਹੈ ।
ਜਿੱਥੇ ਗ਼ਮ ਦਾ ਡੇਰਾ ਹੈ।
ਉਥੇ ਵਾਸਾ ਮੇਰਾ ਹੈ ।
ਖ਼ੁਦਗਰਜ਼ੀ ਦੀ ਦੁਨੀਆ ਦਾ
ਕਿੰਨਾ ਸੌੜਾ ਘੇਰਾ ਹੈ।
ਚੰਨਾ ਤੇਰੇ ਬਿਨ ਮੈਨੂੰ
ਚਾਨਣ ਘੁੱਪ ਹਨੇਰਾ ਹੈ।
ਤਿਲਕਣ-ਬਾਜ਼ ਦਵੈਤੀ ਤਾਂ
ਤੇਰਾ ਹੈ ਨਾ ਮੇਰਾ ਹੈ।
ਆਵਾ-ਗਵਣੀ ਚੱਕਰ ਵਿਚ
ਮਰਨਾ ਤੇ ਇਕ ਫੇਰਾ ਹੈ।
ਗ਼ਮ ਸਹਿਕੇ ਵੀ ਹਸਦਾ ਹਾਂ
ਕਿੰਨਾ ਮੇਰਾ ਜੇਰਾ ਹੈ ।
ਮੇਰੇ ਦਿਲ ਨੂੰ ਛੇੜ ਨ ਅਜ
ਅਜ ਕੁਝ ਦਰਦ ਘਨੇਰਾ ਹੈ ।
ਤੇਰੇ ਹਿਜਰ ਦੇ ਮਾਰੇ ਨੂੰ
ਇਕ ਪਲ ਵਸਲ ਬਥੇਰਾ ਹੈ ।
ਇਸ਼ਕ ਦੇ ਪਾਂਧੀ ਚਲਿਆ ਚਲ
ਇਸ਼ਕ ਦਾ ਪੰਧ ਲਮੇਰਾ ਹੈ ।
ਚੋਟ ਹੈ ਉਹਦੀ ਫੁਕ਼ਰਤ ਦੀ
ਦਿਲ 'ਹਮਦਰਦਾ' ਮੇਰਾ ਹੈ ।
