ਫ਼ੁਰਕਤ ਵਿਚ ਸਹਾਰੇ ਲੱਗਣ ਲੱਗ ਪਏ ਨੇ ।
ਦਿਲ ਦੇ ਦਾਗ਼ ਪਿਆਰੇ ਲੱਗਣ ਲੱਗ ਪਏ ਨੇ ।
ਗ਼ਮ ਦੀ ਰਾਤ ਵੀ, ਅੱਖੋਂ ਡਿਗਦੇ ਅੱਥਰੂ ਵੀ ਸੂਰਜ,
ਚੰਨ, ਸਿਤਾਰੇ ਲੱਗਣ ਲੱਗ ਪਏ ਨੇ ।
ਜਿਸ ਵੇਲੇ ਦੀ ਪਿਆਰ ਦੀ ਬਾਜ਼ੀ ਹਾਰੀ ਏ,
ਸਾਰੇ ਨਫ਼ੇ ਖ਼ਸਾਰੇ ਲੱਗਣ ਲੱਗ ਪਏ ਨੇ ।
ਐਨੀ ਹੌਲੀ ਹੋ ਗਈ ਟੋਰ ਹਿਆਤੀ ਦੀ,
ਆਪਣੇ ਰੰਗ ਵੀ ਭਾਰੇ ਲੱਗਣ ਲੱਗ ਪਏ ਨੇ ।
ਫਿੱਕੇ ਪੈ ਗਏ ਜਦ ਦੇ ਰੰਗ ਤਸਵੀਰਾਂ ਦੇ,
ਸਾਰੇ ਰੂਪ ਉਧਾਰੇ ਲੱਗਣ ਲੱਗ ਪਏ ਨੇ ।
ਬਰਫ਼ਾਂ ਵਾਂਗਰ ਭਰਮ ਅਸਾਡਾ ਖੁਰਿਆ ਏ,
ਸਾਹਵਾਂ ਵਿਚ ਸ਼ਰਾਰੇ ਲੱਗਣ ਲੱਗ ਪਏ ਨੇ ।
ਆਪ ਤੋਂ ਅੱਗੇ ਵੇਖ ਕੇ 'ਸ਼ੈਦਾ' ਸਾਥੀ ਨੂੰ,
ਰਲ ਨਹੀਂ ਸੱਕੇ ਸਾਰੇ ਲੱਗਣ ਲੱਗ ਪਏ ਨੇ ।
