ਗ਼ੈਰਾਂ ਦੇ ਨਾਲ ਸਾਂਝ-ਭਿਆਲੀ ਕੀ ਕਰੀਏ ।
ਇਕ ਦੋ ਘੜੀਆਂ ਦੀ ਖ਼ੁਸ਼ਹਾਲੀ ਕੀ ਕਰੀਏ ।
ਮੀਂਹ ਦੇ ਬਦਲੇ ਅੱਗ ਵਰੀ ਅਸਮਾਨਾਂ ਤੋਂ,
ਗੁਲਜ਼ਾਰਾਂ ਦੇ ਰਾਖੇ ਮਾਲੀ ਕੀ ਕਰੀਏ ।
ਤੇਰੇ ਨਾਂ ਤੋਂ ਆਪਣੀ ਜ਼ਿੰਦੜੀ ਵਾਰ ਦਿੱਤੀ,
ਹੋਰ ਐ ਪਿਆਰ ਨਗਰ ਦੇ ਵਾਲੀ ਕੀ ਕਰੀਏ ।
ਸਭ ਨੇ ਆਖ਼ਰ ਮੌਤ ਦਾ ਜ਼ਾਇਕਾ ਚੱਖਣਾ ਏ,
ਧਨ ਕੀ ਕਰਦਾ, ਰੁਤਬੇ ਆਲੀ, ਕੀ ਕਰੀਏ ।
ਅਰਮਾਨਾਂ ਦੇ ਫੁੱਲ ਤੇ ਦਿਲ ਵਿਚ ਮਹਿਕੇ ਨਾ,
ਹਰ ਸੂ ਸਾਵਣ ਦੀ ਹਰਿਆਲੀ ਕੀ ਕਰੀਏ ।
ਗ਼ਮ ਨੇ ਦਿਲ ਵਿਚ ਦੀਪਕ ਰਾਗ ਅਲਾਪੇ ਸਨ,
ਬੱਦਲੀ ਦੀ ਝੋਲੀ ਸੀ ਖ਼ਾਲੀ ਕੀ ਕਰੀਏ ।
ਜ਼ਹਿਰ ਜ਼ਮੀਨੋਂ ਉੱਗੇ ਥਾਵੀਂ ਫ਼ਸਲਾਂ ਦੇ,
'ਆਹੂ' ਫੜ ਕੇ ਹਲ ਪੰਜਾਲੀ ਕੀ ਕਰੀਏ ।
