ਘਟਾ ਗ਼ਮ ਦੀ ਛਾਈ ਸਵੇਰੇ ਸਵੇਰੇ ।
ਤੇਰੀ ਯਾਦ ਆਈ ਸਵੇਰੇ ਸਵੇਰੇ।
ਉਹਦਾ ਨਾਮ ਆਵੇ ਇਬਾਦਤ 'ਚ ਮੇਰੀ
ਜੋ ਤਸਬੀ ਉਠਾਈ ਸਵੇਰੇ ਸਵੇਰੇ ।
ਹੈ ਪਾਣੀ ਬਥੇਰਾ ਇਹ ਸਾਗਰ ਦੀ ਮਛਲੀ
ਫਿਰੇ ਕਿਉਂ ਤਿਹਾਈ ਸਵੇਰੇ ਸਵੇਰੇ ।
ਜੁ ਨੈਣਾਂ 'ਚੋਂ ਮੇਰੇ ਵਹੀ ਜਾਣ ਹੰਝੂ
ਹੈ ਪੀੜਾ ਪਰਾਈ ਸਵੇਰੇ ਸਵੇਰੇ ।
ਗ਼ਜ਼ਲ ਆ ਸੁਣਾਵੇ ਉਹ ਰੂਹਾਂ ਦਾ ਹਾਣੀ
ਕਿ ਮਹਿਫਲ ਸਜਾਈ ਸਵੇਰੇ ਸਵੇਰੇ ।
ਪਪੀਹੇ ਨੇ ਮੇਘਾਂ ਦੇ ਰਾਹਾਂ 'ਚ ਲਗਦੈ
ਨਜ਼ਰ ਹੈ ਵਿਛਾਈ ਸਵੇਰੇ ਸਵੇਰੇ ।
ਉਕਾਬਾਂ ਨੇ ਅੰਬਰ ਨੂੰ ਛੁਹਣਾ ਸੁਮੈਰਾ
ਉਡਾਰੀ ਲਗਾਈ ਸਵੇਰੇ ਸਵੇਰੇ ।
