"ਚਾਰੇ ਪਾਸੇ ਸੋਸ਼ਲਿਜ਼ਮ ਦਾ ਰੌਲਾ ਗੌਲਾ
ਜਣਾਂ ਖਣਾਂ ਹੀ, ਹੌਲੀ ਹੌਲੀ,
ਠੋਕਰ ਖਾ ਕੇ,
ਇਸ ਦੇ ਵਲ ਖਿਚੀਂਦਾ ਜਾਵੇ ।"
"ਇਹ ਹੁਣ ਸਾਡੇ ਸਿਰ ਦੇ ਉਤੇ,
ਇਕ ਨੰਗੀ ਤਲਵਾਰ ਵਾਂਗਰਾਂ,
ਦਿਨ ਤੇ ਰਾਤੀਂ ਰਹੇ ਲਟਕਦਾ ।"
"ਜਿਹਨੂੰ ਮੂੰਹ ਧੋਣਾ ਨਹੀਂ ਆਉਂਦਾ,
ਜਿਹੜਾ ਨਿਤ ਹੀ ਮੈਲ ਹੰਢਾਉਂਦਾ,
ਉਹ ਵੀ ਏਸ ਸ਼ਬਦ ਨੂੰ ਸੁਣ ਕੇ,
ਆਕੜ ਆਕੜ ਕੇ ਤੁਰਦਾ ਹੈ ।"
"ਠੀਕ ਹੈ ਕਿ ਇਹ ਚਾਨਣ-ਸੋਮਾਂ
ਰਾਹ ਸਾਡਾ ਰੁਸ਼ਨਾ ਸਕਦਾ ਹੈ ।
ਬੀਆਬਾਨਾਂ ਦੀ ਹਿੱਕ ਉਤੇ,
ਵੇਖਦਿਆਂ ਬਸ ਵੇਖਦਿਆਂ ਹੀ,
ਸੂਹੇ ਫੁਲ ਖਿੜਾ ਸਕਦਾ ਹੈ ।"
ਇਸ ਲਈ ਸੱਚ ਤਾਂ ਇਹ ਹੈ ਯਾਰੋ,
ਅੱਜ ਵੇਲਾ ਹੈ
ਬੰਦ ਕਮਰੇ ਵਿਚ ਕੱਠੇ ਹੋ ਕੇ,
ਸੋਸ਼ਲਿਜ਼ਮ ਤੇ ਲੋਕ ਰਾਜ ਦਾ ਮਤਾ ਪਕਾਈਏ ।"
"ਲੰਮੇ ਲੰਮੇ ਵਾਕ ਬਣਾ ਕੇ,
ਧੁੰਦਲੇ ਧੁੰਦਲੇ ਸ਼ਬਦ ਜੋੜ ਕੇ,
ਅਸਲੀ ਮੰਤਵ ਭੰਨ ਤੋੜ ਕੇ,
ਹਰ ਇਕ ਧਿਰ ਦੇ ਹੱਕ ਬਚਾਈਏ ।
ਤੇ ਇੰਜ ਮੂਰਖ ਲੋਕਾਂ ਦੀਆਂ
ਅੱਖਾਂ ਦੇ ਵਿਚ ਘੱਟਾ ਪਾਈਏ ।"
