ਤੂੰ ਇੰਝ ਹੀ ਲਿਖਦਾ, ਗਾਉਂਦਾ ਰਹਿ ਮਰਜਾਣਿਆ,
ਇਤਿਹਾਸ ਚ ਨਵੀਆਂ ਪੈੜਾਂ ਪਾਉਂਦਾ ਰਹਿ ਮਰਜਾਣਿਆਂ।
ਕਿਸੇ ਲੋਕ-ਗੀਤ ਜਿੰਨੀ ਲੰਬੀ ਉਮਰ ਹੋਵੇ ਤੇਰੀ,
ਚਿਰਾਗ-ਏ-ਜਿੰਦਗੀ ਨੂੰ ਜਲਾਉਂਦਾ ਰਹਿ ਮਰਜਾਣਿਆਂ।
ਜੁੱਗ-ਜੁੱਗ ਜੀਵੇ ਤੇਰੀ ਡਫਲੀ ਤੇ ਨਾਲੇ ਝਾਂਜਰਾਂ ਵੀ,
ਕੰਜਰੀ ਵਾਂਗੂੰ ਨੱਚਦਾ-ਨਚਾਉਂਦਾ ਰਹਿ ਮਰਜਾਣਿਆਂ।
ਫਖਰ-ਏ-ਪੰਜਾਬ ਕਹਾਂ ਜਾਂ ਜਾਨ-ਏ-ਪੰਜਾਬ ਤੈਨੂੰ,
ਆਪਣਾ ਹੀਰਾ ਮੁੱਲ ਪਵਾਉਂਦਾ ਰਹਿ ਮਰਜਾਣਿਆਂ।
ਬੁਝੂੰ-ਬੁਝੂੰ ਕਰ ਰਿਹਾ ਜੋ ਇਹਨਾਂ ਤੂਫਾਨਾਂ ਵਿੱਚ,
ਮਾਂ-ਬੋਲੀ ਦਾ ਦੀਵਾ ਜਗਾਉਂਦਾ ਰਹਿ ਮਰਜਾਣਿਆਂ।
ਦਿਲਕਸ ਅੰਦਾਜ਼ ਤੇਰਾ ਤੇ ਦਿਲਕਸ ਸ਼ਾਇਰੀ ਤੇਰੀ,
ਦਿਲਕਸ ਤੂੰ ਖੁਦ ਵੀ ਕਹਾਉਂਦਾ ਰਹਿ ਮਰਜਾਣਿਆਂ।
ਬੱਸ ਇੱਕੋ ਹਸਰਤ ਹੈ ਮੇਰੇ ਦਿਲ ਚੰਦਰੇ ਦੀ,
ਸਿੱਧੂ' ਦੇ ਖਾਬਾਂ ਚ ਆਉਂਦਾ ਰਹਿ ਮਰਜਾਣਿਆਂ।
