ਆਓ ਨੀ ਹਨੇਰੀਓ ! ਜਾਓ ਨੀਂ ਹਨੇਰੀਓ,
ਲੈ ਜਾਓ ਉਡਾ ਕੇ ਮੇਰਾ ਪਿਆਰ ।
ਏਸ ਨੂੰ ਲਜਾ ਕੇ ਝੋਲ੍ਹੀ ਪਾਉਣਾ ਓਸ ਅਬਲਾ ਦੀ,
ਜੀਹਦੀ ਲੁੱਟੀ ਗਈ ਏ ਬਹਾਰ ।
ਸਮਿਆਂ ਦੇ ਗਲ ਜਿੱਥੇ, ਫੜੇ ਨੇ ਗਲੇਡੂਆਂ ਨੇ,
ਉੱਚੀ ਕੋਈ ਸਾਹ ਨਾ ਭਰੇ ।
ਅੱਗ ਨੀ ਮਚਾ ਕੇ ਜਿੱਥੇ ਸੱਸੀ ਦਿਆਂ ਪੈਰਾਂ ਹੇਠਾਂ,
ਜੱਗ ਭੈੜਾ ਸੇਕਿਆ ਕਰੇ ।
ਜਿੱਥੇ ਬਲੀਦਾਨ ਹੁੰਦਾ, ਕੋਇਲ ਨੀ, ਬਚਾਰੜੀ ਦਾ,
ਕਾਲਿਆਂ ਕਾਵਾਂ ਦੇ ਵਿਚਕਾਰ ।
ਲੈ ਜਾਓ ਉਡਾ ਕੇ ਮੇਰਾ ਪਿਆਰ ।
ਅੰਬਰਾਂ 'ਚ ਜਿੱਥੇ ਮਗ਼ਰੂਰ ਕੋਈ ਬੱਦਲੀ ਨੀ,
ਇੱਕੋ ਘੁੱਟ ਚੰਨ ਦੀ ਕਰੇ ।
ਕਿਰਤਾਂ ਦੀ ਆਕੇ ਨੀ ਅੰਗੂਰੀ ਜਿੱਥੇ ਵਿਹਲੜਾਂ ਦਾ,
ਚੋਰੀ ਚੋਰੀ ਵੱਗ ਨੀ ਚਰੇ ।
ਜ਼ਿੰਦਗੀ ਦੀ ਬਾਜ਼ੀ ਜਿੱਥੇ ਪੈਸਿਆਂ ਦੇ ਦੌਰ ਵਿੱਚ,
ਜਿੱਤ ਕੇ ਵੀ ਜਾਂਦਾ ਕੋਈ ਹਾਰ ।
ਲੈ ਜਾਓ ਉਡਾ ਕੇ ਮੇਰਾ ਪਿਆਰ ।
