ਹਾਣੀਆਂ ਵੇ ਹਾਣੀਆਂ
ਕਿੱਥੇ ਲੁਕ ਛੁਪ ਕੇ ਤੂੰ ਪਾਨਾ ਏਂ ਕਹਾਣੀਆਂ
ਬਿਰਹੋਂ ਦੀ ਅਗ ਵਿਚ ਏਦਾਂ ਵੀ ਨਾ ਜਾਲ ਵੇ ।
ਦੇਖ ਆਪ ਆ ਕੇ ਮੇਰਾ ਤਤੜੀ ਦਾ ਹਾਲ ਵੇ ।
ਤੇਰੇ ਬਾਝ ਇਕ ਦਿਨ ਜਾਪੇ ਇਕ ਸਾਲ ਵੇ ।
ਮੇਰੇ ਦਿਨ ਦੇਸੇ ਸਾਰੇ ਲੈ ਗਇਆ ਏਂ ਨਾਲ ਵੇ ।
ਤੇਰੇ ਬਿਨਾਂ ਹੁਣ ਕਦੇ ਖ਼ੁਸ਼ੀਆਂ ਨਹੀਂ ਮਾਣੀਆਂ ।
ਹਾਣੀਆਂ ਵੇ ਹਾਣੀਆਂ
ਕਿੱਥੇ ਲੁਕ ਛੁਪ ਕੇ ਤੂੰ ਪਾਨਾ ਏਂ ਕਹਾਣੀਆਂ ।
ਮੁਖੜੇ ਦੇ ਗੋਰਿਆ ਤੇ ਦਿਲੇ ਦਿਆ ਕਾਲਿਆ।
ਤੇਰੇ ਨਾਲ ਨੇਹੁੰ ਲਾ ਕੇ ਰੋਗ ਅਸਾਂ ਲਾ ਲਿਆ।
ਆਸ਼ਕੀ ਦੇ ਸਾਜ਼ ਉੱਤੇ ਮਾਰੂ ਰਾਗ ਗਾ ਲਿਆ ।
ਹਾਸੇ ਹਾਸੇ ਵਿਚ ਇਕ ਫਾਹਾ ਗਲ ਪਾ ਲਿਆ ।
ਜਾ ਕੇ ਸਾਡੇ ਪਾਸੋਂ ਕਿੱਥੇ ਲੰਮੀਆਂ ਨੇ ਤਾਣੀਆਂ ।
ਹਾਣੀਆਂ ਵੇ ਹਾਣੀਆਂ-
ਕਿੱਥੇ ਲੁਕ ਛੁਪ ਕੇ ਤੂੰ ਪਾਨਾ ਏਂ ਕਹਾਣੀਆਂ ।
ਸੁੱਕੀਆਂ ਨੇ ਆਸਾਂ ਸਾਡੇ ਦੀਦੇ ਨਹੀਂਉਂ ਸੁੱਕਣੇ ।
ਮੁੱਕੀਆਂ ਉਮੀਦਾਂ ਸਾਡੇ ਗ਼ਮ ਨਹੀਉਂ ਮੁੱਕਣੇ ।
ਰੁੱਕਣੇ ਨੇ ਸਾਹ ਸਾਡੇ ਹੌਕੇ ਨਹੀਉਂ ਰੁੱਕਣੇ ।
ਚੁੱਕ ਲਵੇ ਰਬ ਸਾਨੂੰ ਦੁਖ ਨਹੀਂ ਜੇ ਚੁੱਕਣੇ।
ਨਾ ਤੂੰ ਏਸ ਤਰਾਂ ਤੋੜ ਯਾਰੀਆਂ ਪੁਰਾਣੀਆਂ ।
ਹਾਣੀਆਂ ਵੇ ਹਾਣੀਆਂ
ਕਿੱਥੇ ਲੁਕ ਛੁਪ ਕੇ ਤੂੰ ਪਾਨਾ ਏਂ ਕਹਾਣੀਆਂ।
