ਹੰਝੂ ਪੱਲੇ ਪਾ ਕੇ ਲੋਕਾਂ ਹਾਸੇ ਗਹਿਣੇ ਰੱਖੇ ।
ਲੱਭਾ ਕੀ ਉਸ ਪਾਣੀ ਕੋਲ ਪਤਾਸੇ ਗਹਿਣੇ ਰੱਖੇ ।
ਪੂਰਾ ਨਹੀਂ ਪਰ ਹੋ ਸਕਦਾ ਇਹ ਸ਼ੁਰੂ ਰਾਤ ਦਾ ਖ਼ਾਬ,
ਹਿਰਸ ਤਮਾ ਨੇ ਬੰਦੇ ਚਾਰੇ ਪਾਸੇ ਗਹਿਣੇ ਰੱਖੇ ।
ਮੌਸਮ ਬਦਲਣ ਤੇ ਵੀ ਲੱਭੀ ਖਾਰਾਂ ਦੀ ਜਾਗੀਰ,
ਫੁੱਲ ਉਮੀਦਾਂ ਵਾਲੇ ਸੀ ਬੇਆਸੇ ਗਹਿਣੇ ਰੱਖੇ ।
ਜੀਹਨੂੰ ਮੇਰੇ ਪਿਆਰ ਮੁਹੱਬਤ ਦਾ ਨਹੀਂ ਕੋਈ ਯਕੀਨ,
ਮੇਰੇ ਸਾਹ ਵੀ ਓਸੇ ਬੇਵਿਸਵਾਸੇ ਗਹਿਣੇ ਰੱਖੇ ।
ਫੁੱਲ ਵਿਚਾਰਾ ਰਹਿ ਜਾਣਾ ਤੇ ਤੂੰ ਨਹੀਂ ਰਹਿਣਾ ਪਰੀਏ,
ਤੈਨੂੰ ਕੀ ਕੋਈ ਉੱਧਲ ਜਾਣੀਏ 'ਵਾਸੇ' ਗਹਿਣੇ ਰੱਖੇ ।
ਧੀ ਨਿਮਾਣੀ ਨੂੰ ਨਾ ਲੱਭਾ ਤਾਂ ਵੀ ਸੁਰਖ਼ ਦੁਪੱਟਾ,
ਮਾਪਿਆਂ ਨੇ ਸਭ ਘਰ ਦੇ ਤੋਲੇ ਮਾਸੇ ਗਹਿਣੇ ਰੱਖੇ ।
ਚੁੱਲ੍ਹੇ ਨੂੰ ਤਾਅ ਦੇਣ ਲਈ 'ਸੁਲਤਾਨ' ਏ ਗੱਲ ਕੁਚੱਜੀ,
ਬੰਦਾ ਆਪਣੀ ਰਾਵੀ, ਸਿੰਧ, ਬਿਆਸੇ ਗਹਿਣੇ ਰੱਖੇ ।
