ਹਰ ਕਦਮ 'ਤੇ ਹਾਦਸਾ, ਉਸਦਾ ਮੁਕੱਦਰ ਹੋ ਗਿਆ ।
ਜੂਝਦਾ ਹੋਇਆ ਇਹਨਾਂ ਸੰਗ, ਉਹ ਵੀ ਪੱਥਰ ਹੋ ਗਿਆ ।
ਹਰ ਖ਼ੁਸ਼ੀ ਚੁਪਚਾਪ, ਮੇਰੇ ਮਨ 'ਚੋਂ ਹਿਜਰਤ ਕਰ ਗਈ
ਡੁੱਲ੍ਹ ਕੇ ਨੈਣਾਂ 'ਚੋਂ, ਹਰ ਕਤਰਾ ਸਮੁੰਦਰ ਹੋ ਗਿਆ ।
ਪਿਘਲ ਕੇ ਬਿਰਹਣ ਨੇ, ਜਿਉਂ ਮੰਗੀ ਦੁਆ ਮਹਿਬੂਬ ਤੋਂ
ਮਿਹਰਬਾਂ ਓਸੇ ਹੀ ਪਲ, ਬਿਰਹਣ 'ਤੇ ਕਾਦਰ ਹੋ ਗਿਆ ।
ਚੰਨ ਮੁਖੜਾ ਵੇਖ ਕੇ, ਆਖੀ ਮੁਬਾਰਕ ਈਦ ਮੈਂ
ਸਹਿ ਸੁਭਾ ਮੇਰੇ ਤੋਂ ਫਿਰ, ਚੰਨ ਦਾ ਨਿਰਾਦਰ ਹੋ ਗਿਆ ।
ਸੀ ਪਰਾਇਆ ਸ਼ਹਿਰ, ਪਹਿਲਾਂ ਹੀ ਸੁਮੈਰਾ ਵਾਸਤੇ
ਅਜਨਬੀ ਉਸ ਵਾਸਤੇ, ਹੁਣ ਆਪਣਾ ਘਰ ਹੋ ਗਿਆ ।
