ਹਾਰੀਆਂ ਹੋਈਆਂ ਸੋਚਾਂ ਨੂੰ ਕਿਉਂ, ਮੁੜ ਮੁੜ ਪਿਆ ਅਜ਼ਮਾਉਂਦਾ ਏਂ ।
ਜ਼ਾਲਿਮ ਖ਼ਾਤਰ ਜ਼ਾਲਿਮ ਬਣ ਜਾ, ਜੇ ਕਰ ਬਚਣਾ ਚਾਹੁੰਦਾ ਏਂ ।
ਇੱਕ ਦਿਨ ਤੈਨੂੰ ਡੋਬ ਦੇਣਾ ਏ, ਤੇਰੀ ਇਸ ਹਮਦਰਦੀ ਨੇ,
ਮੈਂ ਸੁਣਿਐਂ ਤੂੰ ਸੱਪਾਂ ਨੂੰ ਵੀ, ਅੱਜ-ਕੱਲ੍ਹ ਦੁੱਧ ਪਿਲਾਉਂਦਾ ਏਂ ।
ਅਪਣੇ ਵੱਲੋਂ ਦੇਖ ਲੈ ਹਰ ਇੱਕ, ਇੰਜ ਹੀ ਅੱਖੀਆਂ ਭਰਿਆ ਏ,
ਝੱਲਿਆ ਸੱਜਣਾ ! ਸੱਜਣਾਂ ਨੂੰ ਤੂੰ, ਕਾਹਨੂੰ ਪਿਆ ਅਜ਼ਮਾਉਂਦਾ ਏਂ ।
ਲੁੱਕਣ-ਮੀਟੀ ਦੇ ਵਿੱਚ ਲੁੱਕੇ, ਸੱਜਣ ਲੱਭਣਾਂ ਚਾਹੁੰਨਾਂ ਵਾਂ,
ਛੇਤੀ ਚੜ੍ਹ ਪਉ ਸੋਹਣਿਆਂ ਚੰਨਾਂ ! ਚੜ੍ਹਦਾ ਕਿਉਂ ਸ਼ਰਮਾਉਂਦਾ ਏਂ ?
ਤੇਰੀ ਆਸ ਭੜੋਲੀ ਇਸ ਲਈ ਦਾਣਿਆਂ ਨਾਲ ਭਰੇਂਦੀ ਨਹੀਂ,
ਵੱਤਰ ਆਈ ਭੋਇੰ ਵੀ ਤੂੰ ਵੇਲੇ ਸਿਰ ਨਾ ਵਾਹੁੰਦਾ ਏਂ ।
ਹੋਰ ਘੜੀ ਨੂੰ ਚੰਨ ਚੜ੍ਹਿਆ ਤੇ, ਨ੍ਹੇਰਾ ਉੱਡ-ਪੁਡ ਜਾਣਾ ਏਂ,
ਐਡਾ ਔਖਾ ਪੈਂਡਾ ਨਹੀਂ, ਤੂੰ ਜਿੰਨਾਂ ਪਿਆ ਘਬਰਾਉਂਦਾ ਏਂ ।
ਯਾ 'ਸਲੀਮ' ਤੂੰ ਡਰਿਆ ਹੋਇਐਂ, ਯਾ ਤੂੰ ਅੰਦਰੋਂ ਮੁੱਕਿਆ ਏਂ,
ਕੋਈ ਤੇ ਗੱਲ ਹੈ ਨਾ ਜਿਹੜੀ ਮੈਥੋਂ ਯਾਰ, ਲੁਕਾਉਂਦਾ ਏਂ ।
