ਹੋਇ ਮੁਰੀਦ ਅਜੁਰਦਾ ਆਜਜ਼ ਆਨ ਪਿਆ ਦਰ ਪੀਰਾਂ ਦੇ
ਜਲਦੀ ਅਗਨ ਨਿਵਾਰਨ ਸਤਿਗੁਰ ਸੀਤਲ ਸਾਂਤਿ ਪੁਸੀਰਾਂ ਦੇ
ਪਾਤਸ਼ਾਹ ਪ੍ਰਮੇਸਰ ਬਣਿਆਂ ਸਤਿਗੁਰ ਨਾਲ ਵਜ਼ੀਰਾਂ ਦੇ
ਸਤਿਗੁਰ ਬਾਝੋਂ ਫਿਰਾਂ ਭਰਮਦਾ ਬਣਿਆਂ ਵਾਂਗ ਫ਼ਕੀਰਾਂ ਦੇ
ਦਰ ਦਰ ਵਾਤ ਨ ਪੁਛਦਾ ਕੋਈ ਫਿਰਦਾ ਵਾਂਗ ਫ਼ਕੀਰਾਂ ਦੇ
ਅਸੀਂ ਗੁਨਾਹੀ ਔਗਨਹਾਰੇ ਗੁਰ ਸਿਰ ਤਾਜ ਅਮੀਰਾਂ ਦੇ
ਸਤ ਸੰਤੋਖ ਚੜ੍ਹਾਕੇ ਫੌਜਾਂ ਦੂਰ ਕਰਨ ਬਲ ਬੀਰਾਂ ਦੇ
ਕਾਮ ਕ੍ਰੋਧ ਨੂੰ ਰੇਤ ਰਲਾਵਣ ਮਾਰ ਨਿਸ਼ਾਨੇ ਤੀਰਾਂ ਦੇ
ਨਾਮ ਬਿਹੂਣੇ ਸਤਿਗੁਰ ਬਾਝੋਂ ਕਹੇ ਗੁਮਾਨ ਸਰੀਰਾਂ ਦੇ
ਤਾਰਾਮੀਰਾ ਸਾਗ ਬੀਜ ਕੇ ਸਵਾਦ ਭਾਲਦਾ ਖੀਰਾਂ ਦੇ
ਜੀਉ ਲੋਚਦਾ ਅੰਬ ਖਾਣ ਨੂੰ ਬੂਟੇ ਬੀਜ ਕਰੀਰਾਂ ਦੇ
ਅੱਕ ਬੀਜ ਕੇ ਮੰਗੇ ਮੂਰਖ ਗੁੱਛੇ ਲਾਲ ਹਜੀਰਾਂ ਦੇ
ਭਸਮ ਨਸੀਬ ਭਾਗ ਵਿਚ ਕੋਇਲੇ ਚਾਹੇ ਸਵਾਦ ਪਨੀਰਾਂ ਦੇ
ਅਰਿੰਡ ਬੀਜ ਕੇ ਮੇਵੇ ਮੰਗਦਾ ਕਾਬਲ ਤੇ ਕਸ਼ਮੀਰਾਂ ਦੇ
ਈਸ਼ਰ ਦਾਸਾ ਦੇਖ ਤਮਾਸ਼ਾ ਵਹਿਣ ਅਪੁਠੇ ਨੀਰਾਂ ਦੇ
