ਹੁਣੇ ਹੀ ਜਾ ਕੇ ਕੀ ਕਰੇਂਗਾ
ਅਜੇ ਹੁਣੇ ਤਾਂ ਮਿਲੇ ਸਾ ਆਪਾਂ
ਹੁਣੇ ਹੀ ਤਾਂ ਘਟਾ ਜੇਹੀ ਦੇ ਬੱਦਲ ਆਏ
ਹੁਣੇ ਤਾਂ ਰਿਮਝਿਮ ਨੇ ਟੁਰਨ ਲਗਣਾਂ ਸੀ
ਮਰਜ਼ੀ ਆ ਤੇਰੀ
ਕਿਹੜਾ ਰੋਕ ਸਕਦਾ ਹੈ
ਜਾਣ ਲੱਗਿਆਂ ਨੂੰ ਕੋਈ
ਇਹ ਸੋਚ ਕੇ ਜਾਵੀਂ
ਜਿਹੜੇ ਅੱਜ ਚਾਅ ਮਰਨੇ ਨੇ
ਓਹਨਾਂ ਦਾ ਕੀ ਬਣੂ
ਜਿਹੜੀਆਂ ਰੀਝਾਂ ਨੇ ਖੁਦਕਸ਼ੀ ਕਰਨੀ ਹੈ
ਉਹਨਾਂ ਦੀਆਂ ਭਟਕਦੀਆਂ ਰੂਹਾਂ
ਕਿੰਜ ਲੈਣਗੀਆਂ ਆਰਾਮ
ਕਿੰਜ ਸੌਣਗੀਆਂ ਅੱਧੀ ਰਾਤੇ
ਹੁਣ ਅੱਧੀ ਰਾਤ ਨੂੰ ਨਾ ਜਾਹ
ਹੁਣੇ ਤਾਂ ਅਜੇ ਕੋਂਪਲਾਂ ਜਾਗੀਆਂ ਸਨ
ਹੁਣੇ ਹੀ ਬੰਸਰੀ ਤੜਫ਼ੀ ਸੀ
ਸੁਰ ਨੇ ਨਗਮਾਂ ਫੜਿਆ ਸੀ
ਛੇਕਾਂ 'ਚ ਕੰਪਨ ਵਿਛੀ ਸੀ
ਤਾਰਿਆਂ ਨੇ ਸੇਜ ਸਜਾਈ ਸੀ
ਚਾਨਣੀ ਨੇ ਮਹਿੰਦੀ ਘੋਲੀ ਸੀ
ਅੰਗਾਂ 'ਚ ਤਰੰਨਮ ਜਗੀ ਸੀ
ਕਿਤੇ ਕੋਈ ਪੰਛੀ ਚੁੱਪ ਸੁੱਤਾ ਸੀ
ਕਿਤੇ ਦੋ ਬੋਟ ਰੱਜ ਕੇ ਸੁੱਤੇ ਸਨ
ਕਰੇਂਗਾ ਕੀ ਹੁਣੇ ਹੀ ਜਾਕੇ
ਓਥੇ ਹੈ ਹੀ ਕੀ ਤੇਰਾ
ਏਥੇ ਜੋਬਨ ਖ਼ੁਰ ਰਿਹਾ ਹੈ
