ਹੁਸਨ ਤਿਰਾ ਹਰਜਾਈ ਹੈ।
ਮੇਰਾ ਇਸ਼ਕ ਸੁਦਾਈ ਹੈ।
ਹੁਸਨ ਤਿਰੇ ਅਤਿ ਚਾਈ ਹੈ।
ਸਾਡਾ ਰਾਮ-ਸਹਾਈ ਹੈ।
ਗ਼ੈਰ ਦਾ ਦੁਖ ਹੈ ਮੇਰਾ ਦੁਖ
ਭਾਵੇਂ ਪੀੜ-ਪਰਾਈ ਹੈ।
ਸ਼ੇਖ ਆਇਆ ਹੈ ਠੇਕੇ ਵਿਚ
ਕਿਸ ਨੇ ਬਣਤ-ਬਣਾਈ ਹੈ ?
ਨਾਂਹ ਕਹਿਕੇ ਵੀ ਆਏ ਹੋ
ਲਾ ਕੇ ਫੇਰ ਬੁਝਾਈ ਹੈ।
ਖੋਇਆ ਖੋਇਆ ਰਹਿੰਦਾ ਹਾਂ
ਕੈਸੀ ਕਿਸਮਤ ਪਾਈ ਹੈ ?
ਵਰਜਤ ਵਰਜਤ ਕਹਿਕੇ ਵੀ
ਪੰਡਤ ਨੇ ਵਰਤਾਈ ਹੈ।
ਨਾਗਣ ਵਾਂਗੂੰ ਫਨ ਚੁਕ ਕੇ
ਜ਼ੁਲਫ ਉਧੀ ਲਹਿਰਾਈ ਹੈ ।
ਸ਼ੇਖ਼ ਗਇਆ ਹੈ ਠੇਕੇ ਨੂੰ
ਉਸਨੂੰ ਸੋਝੀ ਆਈ ਹੈ ।
ਗ਼ੈਰ ਆਇਆ ਹੈ ਤੇਰੇ ਨਾਲ
ਹੋਰ ਮੁਸੀਬਤ ਆਈ ਹੈ।
ਮੈਥੋਂ ਖੋਹਿਆ ਯਾਰ ਮਿਰਾ
ਕੀ ‘ਹਮਦਰਦ' ਖੁਦਾਈ ਹੈ ?
