ਇਜਾਜਤ ਵਕਤ ਦੇਂਦਾ ਤਾਂ ਮੁਹੱਬਤ ਕਰ ਗਏ ਹੁੰਦੇ ।
ਅਸੀਂ ਤੇਰੇ ਲਈ ਜਿਊਂਦੇ, ਤੇਰੇ ਲਈ ਮਰ ਗਏ ਹੁੰਦੇ ।
ਜੇ ਅਗਲੇ ਪਾਰ ਮਘਦੀ ਵੇਖ ਲੈਂਦੇ ਚਿਣਗ ਇਸ਼ਕੇ ਦੀ
ਤਾਂ ਫਿਰ ਕੱਚੇ ਘੜੇ ਉੱਤੇ ਝਨਾਂ ਵੀ ਤਰ ਗਏ ਹੁੰਦੇ ।
ਪਤਾ ਲਗਦਾ ਜੇ ਤੇਰਾ ਜਿੱਤਣਾ ਏਨਾ ਜਰੂਰੀ ਸੀ
ਤਾਂ ਇਕ ਤੇਰੀ ਖੁਸ਼ੀ ਖਾਤਰ ਹੀ ਆਖਰ ਹਰ ਗਏ ਹੁੰਦੇ।
ਕਿ ਜਖਮਾਂ ਦੀ ਡੁੰਘਾਈ ਨੂੰ ਜੇ ਹਰਦਮ ਨਾਪਦਾ ਨਾ ਤੂੰ
ਇਹ ਗਹਿਰੇ ਹੁੰਦਿਆਂ ਹੋਇਆਂ ਵੀ ਛੇਤੀ ਭਰ ਗਏ ਹੁੰਦੇ।
ਨਜ਼ਰ ਤੇਰੀ ਸਵੱਲੀ ਜੇ ਕਿਤੇ ਸਾਡੇ 'ਤੇ ਪੈ ਜਾਂਦੀ
ਅਸੀਂ ਦੁਨੀਆਂ ਦੀ ਹਰ ਤਕਲੀਫ ਸਹਿਜੇ ਜਰ ਗਏ ਹੁੰਦੇ।
