ਇਕ ਅਣਮੁੱਲੀ ਯਾਦ ਦੀਆਂ, ਜਾਗੀਰਾਂ ਟੰਗੀਆਂ ਹੋਈਆਂ ਨੇ ।
ਦਿਲ ਦੀ ਬੈਠਕ ਦੇ ਵਿਚ ਕੁੱਝ, ਤਸਵੀਰਾਂ ਟੰਗੀਆਂ ਹੋਈਆਂ ਨੇ ।
ਸੱਚ ਦੇ ਬੇਸਿਰ ਜੁੱਸਿਆਂ ਤੇ, ਸਿਰ ਮੁੜਕੇ ਪੰਘਰਣ ਲਗ ਪਏ ਨੇ ।
ਕੀ ਹੋਇਆ ਜੇ ਸੂਲੀਆਂ ਤੇ ਤਾਅਜ਼ੀਰਾਂ ਟੰਗੀਆਂ ਹੋਈਆਂ ਨੇ ।
ਕੋਈ ਮੁਸਾਫ਼ਿਰ ਡਰਦਾ ਮਾਰਾ, ਇਸ ਦੀ ਛਾਵੇਂ ਬਹਿੰਦਾ ਨਾ,
ਰੁੱਖ ਦੇ ਟਾਹਣੇਂ-ਟਾਹਣੇਂ ਤੇ, ਜੰਜ਼ੀਰਾਂ ਟੰਗੀਆਂ ਹੋਈਆਂ ਨੇ ।
ਉਦਮੀ ਬੰਦੇ ਅੱਗੇ ਮੰਜ਼ਿਲ, ਆਪੇ ਟੁਰ ਕੇ ਆਉਂਦੀ ਏ,
ਹਿੰਮਤ ਦੀ ਟੀਸੀ ਤੇ ਸਭ, ਤਕਦੀਰਾਂ ਟੰਗੀਆਂ ਹੋਈਆਂ ਨੇ ।
ਨਾਲ ਧਿਆਨ ਪੜ੍ਹੇ ਜੇ ਕੋਈ, ਹੱਕ ਦਾ ਰਸਤਾ ਲੱਭਦਾ ਏ,
ਵਿਚ ਫ਼ਿਜ਼ਾ ਦੇ ਸਭ ਅਜ਼ਲੀ, ਤਹਿਰੀਰਾਂ ਟੰਗੀਆਂ ਹੋਈਆਂ ਨੇ ।
ਐਵੇਂ ਤੇ ਨਹੀਂ ਮਿਲਿਆ ਚਾਨਣ, ਸਾਨੂੰ ਇਹ ਆਜ਼ਾਦੀ ਦਾ,
ਨੇਜਿਆਂ ਉੱਤੇ ਖ਼ੂਨ ਦੀਆਂ, ਤਨਵੀਰਾਂ ਟੰਗੀਆਂ ਹੋਈਆਂ ਨੇ ।
'ਸ਼ੈਦਾ' ਰਾਤ ਦੀ ਕੁੱਖ ਦੇ ਵਿੱਚੋਂ, ਓੜਕ ਸੂਰਜ ਫੁੱਟਦਾ ਏ,
ਖ਼ਾਬਾਂ ਦੀ ਵਲਗਨ ਦੇ ਵਿਚ, ਤਾਅਬੀਰਾਂ ਟੰਗੀਆਂ ਹੋਈਆਂ ਨੇ ।
