ਇਕ ਇਕ ਕਰਕੇ ਡਿਗਦੇ ਜਾਂਦੇ ਜਿਹੜੇ ਰੁੱਖ ਪੁਰਾਣੇ ਨੇ ।
ਨਵਿਆਂ ਨੇ ਕੀ ਛਾਂ ਵਰਤਾਣੀ, ਹਾਲੀ ਆਪ ਅਯਾਣੇ ਨੇ ।
ਆਪ ਮੁਹਾਰੀਆਂ ਲਗਰਾਂ ਦੇਖੋ, ਮੁੱਢ ਨੂੰ ਪੈਰੀਂ ਦੇਵਣ ਪਾ,
ਬਾਗ਼ ਦੀ ਛਾਂਟੀ ਕਰਕੇ ਰੱਖੀਉ ਕਹਿ ਗਏ ਸੱਚ ਸਿਆਣੇ ਨੇ ।
ਮਾਰੋ ਮਾਰੀ ਕੀਕਣ ਮੁੱਕੇ ਭੁੱਖ ਨਹੀਂ ਮੁੱਕਦੀ ਅੱਖੀਆਂ ਦੀ,
ਅੱਖੀਆਂ ਬੱਧੀ ਭੁੱਖ ਦੇ ਸ਼ੀਸ਼ੇ ਅੱਖਰਾਂ ਨਾਲ ਹਟਾਣੇ ਨੇ ।
ਲੋੜਾਂ ਪੈਂਰੀ ਸੰਗਲ ਪਾਏ, ਸਭਨਾਂ ਸੰਗਾਂ ਸਾਕਾਂ ਨੂੰ,
ਚੇਤੇ ਰੱਖ ਇਸ ਦੌਰ ਦੇ ਮਿੱਤਰ ਆਪਾਂ ਨਈਂ ਅਜ਼ਮਾਣੇ ਨੇ ।
ਵੱਖਰਾ ਵੱਖਰਾ ਕਰਕੇ ਸਾਨੂੰ ਆਪਣਾ ਚਾਕਰ ਕੀਤਾ ਨੇ,
ਇਕਲਾਪੇ ਨੂੰ 'ਆਤਿਸ਼' ਲਾ ਕੇ ਅਕੜੇ ਸਿਰ ਨੀਵਾਣੇ ਨੇ ।
