ਇਕ ਨਦੀ ਵਾਂਗਰ ਰਵਾਨੀ ਓਸ ਦੀ।
ਜੋ ਕਹਾਣੀ ਮੈਂ ਬਿਆਨੀ ਓਸਦੀ ।
ਸੋਭਦੇ ਜਿਉਂ ਚੰਨ ਤਾਰੇ ਰਾਤ ਨੂੰ
ਸੋਭਦੀ ਸੂਰਤ ਨੁਰਾਨੀ ਓਸ ਦੀ।
ਸੌਂ ਗਿਆ ਪਲਕਾਂ 'ਤੇ ਦੀਵੇ ਬਾਲ ਕੇ
ਬੇਮਿਸਾਲੀ ਸਾਵਧਾਨੀ ਓਸ ਦੀ ।
ਨੈਣ ਕਹਿ ਦੇਂਦੇ ਨੇ ਸਭ ਬੋਲੇ ਬਿਨਾ
ਕੀ ਕਹਾਂ ਜਾਦੂ ਬਿਆਨੀ ਓਸ ਦੀ।
ਅਰਥ ਤਾਂ ਸ਼ਬਦਾਂ ਦੇ ਨੇ ਗਹਿਰੇ ਬੜੇ
ਤੀਰ ਵਾਂਗੂੰ ਤੇਜ ਕਾਨੀ ਓਸ ਦੀ ।
ਖਿਆਲ ਉਡਦੇ ਅੰਬਰੀਂ ਸੁਰਖ਼ਾਬ ਜਿਉਂ
ਸੋਚਣੀ ਹੈ ਆਸਮਾਨੀ ਓਸਦੀ ।
ਹਰ ਇਰਾਦੇ ਵਿਚ ਬੜੀ ਪੁਖਤਾ ਦਿਲੀ
ਬਸ ਮੁਹੱਬਤ ਹੈ ਰੁਹਾਨੀ ਓਸਦੀ ।
ਕਹਿਣ ਨੂੰ ਤਾਂ ਕਹਿ ਰਹੇ ਨੇ ਸਭ ਗ਼ਜ਼ਲ
ਇਹ ਸੁਮੈਰਾ ਤਰਜ਼ਮਾਨੀ ਓਸ ਦੀ ।
