ਇਕ ਨੂੰ ਤੂੰ ਨੀਰ ਦੂਜੇ ਨੂੰ ਜ਼ਮੀਨ ਕਰ ਦੇ ਸਾਹਿਬ
ਦੋਹਾਂ ਨੂੰ ਇਕ ਦੂਜੇ ਵਿਚ ਲੀਨ ਕਰ ਦੇ ਸਾਹਿਬ
ਪਾਣੀ ਦੀ ਹਿੰਝ ਦੇਖਾਂ ਪੌਣਾਂ ਦੇ ਰੰਗ ਦੇਖਾਂ
ਮੇਰੀ ਨਜ਼ਰ ਨੂੰ ਏਨੀ ਤੂੰ ਮਹੀਨ ਕਰ ਦੇ ਸਾਹਿਬ
ਜਿਸ ਤੋਂ ਲਏ ਉਧਾਰੇ ਮੈਂ ਰੂਹ ਦੇ ਰੰਗ ਸਾਰੇ
ਇਸ ਰੂਹ ਨੂੰ ਓਸ ਦਰ ਦੀ ਮਸਕੀਨ ਕਰ ਦੇ ਸਾਹਿਬ
ਤੇਰੀ ਰਜ਼ਾ ’ਚ ਰਹਿੰਦੇ ਹਰ ਦਮ ਅਜ਼ੀਜ਼ ਤੇਰੇ
ਮੈਨੂੰ ਵੀ ਇਸ ਕਲਾ ਵਿਚ ਪਰਬੀਨ ਕਰ ਦੇ ਸਾਹਿਬ
ਇਸ ਦੀ ਹੀ ਲੋਅ ’ਚ ਦਿਸਦਾ ਹਰ ਰੰਗ ਜ਼ਿੰਦਗੀ ਦਾ
ਇਸ ਦਰਦ ਨੂੰ ਹੀ ਦਿਲ ਦੀ ਤਸਕੀਨ ਕਰ ਦੇ ਸਾਹਿਬ
ਜੀਕਣ ਹਨ੍ਹੇਰਿਆਂ ਵਿਚ ਦੀਵੈ ਦੀ ਲਾਟ ਕੋਈ
ਆਪਣੀ ‘ਸੁਖ਼ਨ’ ਨੂੰ ਏਨੀ ਕੁ ਹੁਸੀਨ ਕਰ ਦੇ ਸਾਹਿਬ
