ਇਕ ਤੇਰੀ ਪ੍ਰੀਤ ਨੇ, ਐਡੀ ਚਾ ਸੁਦਾਇਨ ਕੀਤੀ,
ਵੇਖ ਕੇ ਹਾਲ ਮੇਰਾ, ਰੇਤ ਦੇ ਹੱਸਦੇ ਕਿਣਕੇ ।
ਹਾਇ ! ਬਿਜਲੀ ਨੇ ਵੀ ਉਹ ਤਾੜ ਕੇ ਸਾੜ ਮੁਕਾਈ,
ਆਲ੍ਹਣਾ ਪਾਇਆ ਸੀ ਜਿਸ, ਟਹਿਣੀ ਤੇ ਚੁਣ ਚੁਣ ਤਿਣਕੇ ।
ਇਕ ਤੇਰੀ ਪ੍ਰੀਤ ਤੇ ਮਿਹਣੇ ਨੇ ਹਜ਼ਾਰਾਂ ਮੈਨੂੰ,
ਲੂਤੀਂਆਂ ਲਾਉਂਦੇ, ਜ਼ਮਾਨੇ ਦੇ ਨੇ ਜਿਹੜੇ ਭਿਣਕੇ ।
ਕੀਹ ਵੇ ਹੱਥ ਆਇਆ ਤੇਰੇ, ਬਾਂਕਿਆ ਢੋਲ ਸਿਪਾਹੀਆ !
ਸੀਨਾ ਸੱਲ੍ਹ ਕੇ ਤੇ, ਕਲੇਜਾ ਇਹ ਨਿਮਾਣਾ ਵਿਣ੍ਹ ਕੇ ।
ਕੁਝ ਲਿਆ ਫੁਲਾਂ ਨੇ, ਲਾਲਾ ਨੇ, ਨਰਗਸ ਨੇ ਲਿਆ;
ਬਾਗਾਂ ਵਿਚ ਵੰਡ ਗਿਆ, ਖੂਨ ਮੇਰਾ ਮਿਣ ਮਿਣ ਕੇ ।
ਕਦੀ ਸ੍ਵਾਸਾਂ 'ਚਿ ਕਮੀ, ਆਵੇ ਨਾ ਦੁੱਖਾਂ 'ਚਿ ਕਮੀ,
ਰੱਬਾ ! ਝੋਲੀ 'ਚਿ ਮੇਰੀ, ਪਾਏ ਨੇ ਦੁੱਖੜੇ ਗਿਣ ਕੇ ।
ਹਾਏ ਵੇ ਪੱਟ ਗਿਓਂ, ਚੰਗੀ ਨਿਭਾਈ ਆ ਸੱਜਣਾ,
ਤੈਨੂੰ ਤੇ ਮੈਂ ਸੀ ਲਿਆ, ਮੌਲਾ ਤੋਂ ਮੰਗ ਕੇ ਪਿੰਨ ਕੇ ।
ਕਿਉਂ ਨਾ ਹਰ ਸ਼ੇਇਰ ਮੇਰਾ, ਜਾਏ ਸਲ੍ਹਾਇਆ 'ਆਸੀ',
ਰੱਖ ਦਿਆਂ ਵਰਕੇ ਤੇ ਜਦ, ਜਿਗ਼ਰ ਦੇ ਟੋਟੇ ਚਿਣ ਕੇ ।
