ਜਦ ਅਸਮਾਨ ਤੇ ਚੜ੍ਹੀਆਂ ਥੱਲੇ ਡਿਗਣਾ ਏ
ਫ਼ਿਰ ਵੇਖੀਂ ਤੂੰ ਬੜੀਆਂ ਥੱਲੇ ਡਿਗਣਾ ਏ
ਫ਼ਿਰ ਪਿੱਟਣਾ ਏ ਤਸਬੀ ਧਾਗੇ ਖਾਣੀ ਨੇ
ਟੁੱਟ ਕੇ ਜਿਸ ਦਿਨ ਲੜੀਆਂ ਥੱਲੇ ਡਿਗਣਾ ਏ
ਜਿਹੜੇ ਵੇਲੇ ਸੱਚ ਦੀ ਲੱਲਕਰ ਵੱਜਨੀ ਏ
ਝੂਠ ਦੀਆਂ ਸਭ ਤੜ੍ਹੀਆਂ ਥੱਲੇ ਡਿਗਣਾ ਏ
ਜਦ ਮੈਂ ਪੁੱਜ ਕੇ ਝੂਣਾ ਦਿੱਤਾ ਆਕੜ ਨੂੰ
ਕਿੰਨੀਆਂ ਈ ਫ਼ਿਰ ਅੜੀਆਂ ਥੱਲੇ ਡਿਗਣਾ ਏ
ਮੈਂ ਕੀ ਡਿਗਣਾ ਆਪ ਖਲੋਤੇ ਹੋਏ ਨੇ
ਨਾਲ਼ ਵਸਾਖੀ ਖੜ੍ਹੀਆਂ ਥੱਲੇ ਡਿਗਣਾ ਏ
ਇਸ ਘੁਮੰਡ ਦੀ ਛੱਤ ਨੇ ਵੀ ਢਹਿ ਪੈਣਾ ਏ
ਥੰਮੀਆਂ ਤੇ ਜਦ ਕੜੀਆਂ ਥੱਲੇ ਡਿਗਣਾ ਏ
ਹੋਰ ਕਿਸੇ ਨੂੰ ਲੋੜ ਨਹੀਂ ਧੱਕਾ ਦੇਵਣ ਦੀ
ਆਪ ਈ ਅੰਦਰੋਂ ਸੜੀਆਂ ਥੱਲੇ ਡਿਗਣਾ ਏ
ਵੇਖ ਲਈਂ 'ਸੰਧੂ' ਬੁਲ੍ਹੇ ਸ਼ਾਹ ਦੀ ਸਰਦਲ ਤੋਂ
ਓੜਕ ਨੂੰ ਪਾ ਪੜ੍ਹੀਆਂ ਥੱਲੇ ਡਿਗਣਾ ਏ
