ਜੇ ਕਰ ਮੇਰੇ ਸਾਰੇ ਹੰਝੂ ਮਿੱਟੀਆਂ ਖ਼ਾਕਾਂ ਜੋਗੇ ।
ਮੈਂ ਵੀ ਹੌਕੇ ਸਾਂਭ ਲਏ ਨੇ ਕੁਝ ਅਸਮਾਨਾਂ ਜੋਗੇ ।
ਏਸ ਜ਼ਮਾਨੇ ਵਰਗਾ ਕੋਈ ਕਾਲ ਸਮਾਂ ਨਹੀਂ ਸੁਣਿਆ,
ਟਾਵੇਂ ਟਾਵੇਂ ਵੀ ਨਹੀਂ ਲੱਭਦੇ ਲੋਕ ਮਿਸਾਲਾਂ ਜੋਗੇ ।
ਇਕਲਾਪੇ ਦੀ ਭੱਠੀ ਸੜਣਾ ਵਕਤ ਨਸੀਬਾ ਸਾਡਾ,
ਏਥੇ ਸਾਰੇ ਰੌਣਕ ਮੇਲੇ ਹੈਣ ਸ਼ਰੀਕਾਂ ਜੋਗੇ ।
ਜਿੰਦ ਤਿਹਾਈ ਮਰ ਜਾਣੀ ਏ ਇੰਜ ਲਗਦਾ ਏ ਮੈਨੂੰ,
ਏਥੇ ਸਾਰੇ ਸ਼ਰਬਤ ਹਾਜ਼ਰ ਜਿਸਮਾਂ ਜੁੱਸਿਆਂ ਜੋਗੇ ।
ਝੱਲਿਆ ਨਿਰੀਆਂ ਚੀਕਾਂ ਲੈ ਕੇ ਜ਼ਿਲਾ ਕਚਹਿਰੀ ਚੱਲਿਐਂ,
ਪੈਸੇ ਵੀ ਕੁਝ ਤੇਰੇ ਪੱਲੇ ਹੈਣ ਵਕੀਲਾਂ ਜੋਗੇ ।
ਕੋਈ ਰਮਜ਼ ਨਾ ਪੱਲੇ ਪੈਂਦੀ ਉਹਦੀਆਂ ਉਹ ਹੀ ਜਾਣੇ,
ਧੁੱਪਾਂ ਰੇਤਾਂ ਜੋਗੀਆਂ 'ਅਨਵਰ' ਬੱਦਲ ਬਰਫ਼ਾਂ ਜੋਗੇ ।
