ਜੀਮ-ਜੇ ਦਰਦ ਅਸਾਡੇ ਦਾ ਵਾਕਿਫ ਨਹੀਂ
ਤਾਂ ਵੇਖ ਵੇ ਨੀਂਗਰਾ ਆਰਸੀ ਨੂੰ ।
ਵੇਖਾਂ ਕਿਆ ਕੁਝ ਥੀਆ ਦਿਲ ਨੂੰ
ਕਿਆ ਕੁਝ ਆਵਸੇਂ ਬਰਸਰ ਆਰਸੀ ਨੂੰ ।
ਜੇ ਚੜ੍ਹੇਂ ਜਹਾਜ਼ੇ ਮੱਕੇ ਨੂੰ ਮੁੱਖ ਕਰੇਂ
ਸੂਰਤ ਬੰਦਰ ਆਰਸੀ ਨੂੰ ।
ਪਵੇ ਵਾਉ ਮੁਖਾਲਿਫ ਥਕਣ ਠਾਠੀਂ
ਕੜਕਣ ਕੱਪੜ ਆਰਸੀ ਨੂੰ ।
ਤਾਂ ਵੱਤ ਹਾਲ ਅਸਾਡੜਾ ਜਾਨੀ
ਘੱਤੇਂ ਲੰਗਰ ਆਰਸੀ ਨੂੰ ।
ਪਰ ਭੜਕ ਲੱਗੇ ਮਤਾਂ ਤ੍ਰਿਖੜੀ ਆਤਿਸ਼
ਵੇਖ ਨ ਦਿਲਬਰ ਆਰਸੀ ਨੂੰ ।
ਕਰ ਨ ਸਮੁੰਦਰ ਜੌਹਰ ਤਾਈਂ
ਕਰ ਨ ਉਹ ਸੁੰਦਰ ਆਰਸੀ ਨੂੰ ।
ਇਸ ਸੰਗੀਂ ਦਿਲ ਦੇ ਕਾਰਣ ਦਿਲਬਰ
ਜਗਮਗ ਨ ਕਰ ਆਰਸੀ ਨੂੰ ।
ਜੇ ਆਪ ਨੂੰ ਵੇਖੇਂ ਤਾਂ ਵਤ ਆਖੇਂ
ਸੱਚ ਓ ਹੈਦਰ ਆਰਸੀ ਨੂੰ ।੧੩।
