ਲੋਕੀਂ ਪਤਾ ਨਹੀ ਕਿੰਝ ਦਾਅਵੇ ਕਰੀ ਜਾਂਦੇ ।
ਸਾਨੂੰ ਝੂਠੇ ਦਾਅਵੇ ਕਰਨੇ ਆਉਂਦੇ ਨਹੀ ।
ਅਸੀਂ ਸਿੱਧੇ ਗਏ ਤੇ ਦਿਲ ਦੀ ਦੱਸ ਦਿੱਤੀ ।
ਸ਼ਾਇਦ ਏਸੇ ਲਈ ਸੱਜਣ ਮਨ ਭਾਉਂਦੇ ਨਹੀ ।
ਚਿੱਟੇ ਵਰਕ ਜਿਹਾ ਦਿਲ ਨੂੰ ਕਹਿਣ ਅਪਣੇ ।
ਕਿਉਂ ਸਾਨੂੰ ਲੱਗੇ ਦਾਗ਼ ਦਿਖਾਉਂਦੇ ਨਹੀ ।
ਅਸੀਂ ਸਾਰੀਆਂ ਬੁਰਾਈਆਂ ਦੱਸ ਛੱਡੀਆਂ ।
ਕਿ ਲੱਗੀ ਵਾਲੇ ਤੋਂ ਕੁਝ ਛਿਪਾਉਂਦੇ ਨਹੀ
ਉਹ ਡਰਦੇ ਨਹੀ, ਕਹਿੰਦੇ ਸਾਫ਼ ਪਵਿੱਤਰ ਹਾਂ ।
ਸਾਨੂੰ ਉਹਦੇ ਛਲ, ਸਮਝ ਕਿਤੇ ਆਉਂਦੇ ਨਹੀ ।
ਇੱਕ ਦਗਾ ਹੀ ਕਰਨਾ ਨਹੀ ਸਿੱਖਿਆ ।
ਨਹੀਂ ਤੇ ਗੀਤ ਗ਼ਮਾਂ ਦੇ ਗਾਉਂਦੇ ਨਹੀ ।
ਦੀਪ ਜਗਦਾ ਰਹੇ ਮੇਰੇ ਪਿਆਰ ਵਾਲਾ ।
'ਸਰਬ' ਰੋਜ਼ ਨਵਾਂ ਦੀਪ ਜਗਾਉਂਦੇ ਨਹੀਂ ।
ਦਿਨ ਰਾਤ ਉਸੇ ਦੀਵੇ ਜਾ ਜਾ ਤੇਲ ਪਾਉਂਦੇ ।
ਦੀਵੇ ਲੋਕਾਂ ਦੇ ਜਗੇ ਬੁਝਾਉਂਦੇ ਨਹੀ ।
ਲੋਕੀਂ ਜਿਉਂਦਿਆਂ ਨੂੰ ਨਿੱਤ ਕਰਨ ਸਜਦੇ ।
'ਸਰਬ' ਮੋਇਆ ਨੂੰ ਯਾਰ ਭੁਲਾਉਂਦੇ ਨਹੀ ।
ਏਸੇ ਲਈ ਪਾਕਿ ਪਵਿੱਤਰ ਰੂਹਾਂ ਨੂੰ ।
ਰਸਤੇ ਪਿਆਰ ਦੇ ਰਾਸ ਲੋਕੋ ਆਉਂਦੇ ਨਹੀ ।
