ਜਿਸਮ ਨੂੰ ਤੇ ਜਾਨ ਨੂੰ ਕੀ ਹੋ ਗਿਆ ।
ਅੱਜ ਦੇ ਇਨਸਾਨ ਨੂੰ ਕੀ ਹੋ ਗਿਆ ।
ਸਾਜ਼ਿਆ ਸੀ ਜੋ ਹਿਆਤੀ ਵਾਸਤੇ,
ਸਾਜ਼ ਨੂੰ ਸਾਮਾਨ ਨੂੰ ਕੀ ਹੋ ਗਿਆ ।
ਮੇਰਿਆਂ ਰਾਹਵਾਂ ਦੇ ਵਿਚ ਨੇ ਔਕੜਾਂ,
ਅੱਜ ਤੇਰੇ ਅਹਿਸਾਨ ਨੂੰ ਕੀ ਹੋ ਗਿਆ ।
ਮੇਰੇ ਆਵਣ ਤੋਂ ਉਹ ਪਹਿਲਾਂ ਤੁਰ ਗਿਆ,
ਕੀ ਮੇਰੇ ਮਹਿਮਾਨ ਨੂੰ ਕੀ ਹੋ ਗਿਆ ।
ਜਿਚ ਕਿਉਂ ਕਰਦੇ ਨੇ ਪਏ ਬੀਮਾਰ ਨੂੰ,
ਦਰਦ ਨੂੰ ਦਰਮਾਨ ਨੂੰ ਕੀ ਹੋ ਗਿਆ ।
ਕਦ ਗਿਲੇ ਸ਼ਿਕਵੇ ਸੀ ਕਰਦਾ ਦਿਲ ਤੇਰਾ,
ਖ਼ਵਰੇ ਇਸ ਨਾਦਾਨ ਨੂੰ ਕੀ ਹੋ ਗਿਆ ।
ਸ਼ੁਕਰ ਕਰਨਾ 'ਸਰਵਰੀ' ਮਸਲਿਕ ਤੇਰਾ,
ਅੱਜ ਤੇਰੇ ਈਮਾਨ ਨੂੰ ਕੀ ਹੋ ਗਿਆ ।
