ਜਿੱਥੇ ਕੀਤੀ ਜਦ ਵੀ ਕੀਤੀ, ਗੱਲ ਸੁਚੇਰੀ ਕੀਤੀ ।
ਝੂਠਾਂ ਦੇ ਇਸ ਦੌਰ 'ਚ ਉਸਨੇ, ਖ਼ੂਬ ਦਲੇਰੀ ਕੀਤੀ ।
ਤੇਰੇ ਸ਼ਹਿਰ ਦਿਆਂ ਲੋਕਾਂ ਨੇ, ਉਸੇ ਨੂੰ ਵਡਿਆਇਆ,
ਜੀਹਨੇ ਹਰ ਕੰਮ ਦੇ ਵਿਚ ਏਥੇ, ਹੇਰਾ ਫੇਰੀ ਕੀਤੀ ।
ਜਦ ਦੁਨੀਆਂ ਤੋਂ ਰੁਖ਼ਸਤ ਹੋਇਆ, ਖ਼ਾਲੀ ਹੱਥ ਸਨ ਉਸ ਦੇ,
ਉਹ ਬੰਦਾ ਜਿਸ ਜਿਉਂਦੀ ਜਾਨੇ, ਮੇਰੀ ਮੇਰੀ ਕੀਤੀ ।
ਮਹਿਫ਼ਲ ਦੇ ਵਿਚ ਮੈਂ ਤੇ ਹੈ ਬਸ, ਆਪਣਾ ਰੋਣਾਂ ਰੋਇਆ,
ਤੂੰ ਕਿਉਂ ਸਮਝੇਂ ਬੇਦਰਦਾਂ ਕਿ, ਗੱਲ੍ਹ ਮੈਂ ਤੇਰੀ ਕੀਤੀ ।
ਮੁਨਸਿਫ਼ ਨੇ ਛੱਡ ਦਿੱਤਾ ਉਸ ਜ਼ਾਲਮ ਨੂੰ ਰਿਸ਼ਵਤ ਲੈ ਕੇ,
ਇਕ ਬੇਵਾਹ ਦੀ ਵਸਦੀ ਦੁਨੀਆ, ਜੇਸ ਹਨੇਰੀ ਕੀਤੀ ।
ਉਹਨੇ ਮੈਨੂੰ ਗਾਲਾਂ ਕੱਢ ਕੇ, ਆਪਣਾ ਭਰਮ ਗਵਾਇਆ,
ਉੱਤੋਂ ਮੈਂ ਚੁੱਪ ਰਹਿਕੇ ਉਹਦੇ, ਨਾਲ ਵਥੇਰੀ ਕੀਤੀ ।
'ਅਨਵਰ' ਅੱਜ ਉਸ ਬੰਦੇ ਦੇ ਕੰਮ, ਮੈਂ ਕੀਵੇਂ ਨਾ ਆਵਾਂ,
ਔਖੇ ਪਲ ਜਿਸ ਹਰ ਸ਼ੈ ਮੇਰੇ, ਅੱਗੇ ਢੇਰੀ ਕੀਤੀ ।
