ਜੁੱਸਾ ਦੋਜ਼ਖ਼ ਵਾਂਗ ਤਪਾਈ ਰੱਖਦੇ ਨੇ ।
ਤੇਰੇ ਚੇਤੇ ਅੱਗਾਂ ਲਾਈ ਰੱਖਦੇ ਨੇ ।
ਜਿਨ੍ਹਾਂ ਜੱਗ ਵਿਚ ਪਿਆਰ ਨਿਭਾਉਣਾ ਹੁੰਦਾ ਏ
ਦਿਲ ਵਿਚ ਆਪਣਾ ਯਾਰ ਵਸਾਈ ਰੱਖਦੇ ਨੇ ।
ਉਨ੍ਹਾਂ ਨੇ ਕੀ ਸੱਚ ਦਾ ਕਲਮਾ ਕਹਿਣਾ ਏ,
ਜਿਹੜੇ ਆਪਣੀ ਧੌਣ ਨਿਵਾਈ ਰੱਖਦੇ ਨੇ ।
ਇਹ ਵਸਤੀ ਏ ਸਾਰੀ ਚੋਰਾਂ ਠੱਗਾਂ ਦੀ,
ਏਥੇ ਸਾਰੇ ਭੇਸ ਵਟਾਈ ਰੱਖਦੇ ਨੇ ।
ਮੈਂ ਉਨ੍ਹਾਂ ਨੂੰ ਪਾਗਲ ਹੀ ਕਹਿ ਸਕਨਾ ਵਾਂ,
ਜਿਹੜੇ ਲੋਕੀ ਆਸ ਪਰਾਈ ਰੱਖਦੇ ਨੇ ।
ਝੱਲਾ ਏਂ ਤੂੰ ਸ਼ੀਸ਼ਾ ਚੁੱਕੀ ਫਿਰਨਾ ਏਂ,
ਏਥੇ ਤੇ ਸਭ ਪੱਥਰ ਚਾਈ ਰੱਖਦੇ ਨੇ ।
'ਅਨਵਰ' ਕੀਵੇਂ ਝੂਠਾ ਹਾਸਾ ਹੱਸਾਂ ਮੈਂ,
ਦੁਖੜੇ ਮੇਰੀ ਜਾਨ ਸੁਕਾਈ ਰੱਖਦੇ ਨੇ ।
